Ֆրանսիայում անառակ կատուն տուն է վերադարձել անհետանալուց 9 տարի անց
Ֆրանսիայում 2008 թվականին կորած Կալինու մականունով սպիտակ կատուն վերադարձել է իր տիրուհի Աննի եւ նրա դուստր Ժյուլեթի մոտ: Le Parisien պարբերականը հայտնում է, որ օգոստոսի 16-ին կինը նրան հայտնաբերել է տան բակում նստած եւ սկզբում աչքերին չի հավատացել: Այն, որ կատուն հենց Կալինուն է, ապացուցվում է կենդանու մարմնի վրա եղած այն նույն նշաններով, ինչպիսիք կային կորած ձեռնասունի վրա:
«Մենք երբեք չենք իմանա, թե նրա հետ ինչ է պատահել, բայց նա հիմա մեզ հետ է,- ասել է Աննը՝ պատմելով նորությանը տեղեկացած դստեր արձագանքի մասին: -Նա արձակուրդում էր, երբ զանգահարեցի նրան, նա անընդհատ կրկնում էր. «Անհավանական է, անհավանական է»:
«Սա տարեդարձիս օրը ամենալավ նվերն էր, որի մասին կարող էի միայն երազել»,- նշել է Ժյուլեթը: Կատվի վերադառնալուց 2 օր առաջ նա 17 տարեկան է դարձել:
Տերերի խոսքով՝ Կալինուն ամենեւին չի փոխվել: