Մենք կբուժվենք ու կլինենք առավել հզոր, քան երբևէ. Թրամփը համոզված է, որ բողոքի ակցիաները կմիավորեն ԱՄՆ-ն
ԱՄՆ նախագահ Դոնալդ Թրամփը հայտարարել է, որ զանգվածային բողոքի ակցիաները կարող են միավորել ամերիկացի ժողովրդին և «պառակտված երկիրը»: Այս մասին նա գրել է Twitter-ի իր պաշտոնական էջում:
«Մեր հզոր երկիրը տասնամյակներ շարունակ մնում է պառակտված վիճակում: Երբեմն պետք է բողոք՝ հանուն բուժման, և մենք կբուժվենք ու կլինենք առավել հզոր, քան երբևէ», - գրել է Թրամփը:
Բացի այդ՝ Թրամփը նաև ողջունել է Բոստոնում բողոքի երթի դուրս եկած ամերիկացիներին: Նա նշել է, որ ցանկանում է ծափահարել այն ԱՄՆ քաղաքացիներին, որոնք փողոցներ են դուրս եկել ատելության ու անհանդուրժողականության դեմ:
Հիշեցնենք, որ անցյալ շաբաթ ամերիկյան Շարլոտսվիլ քաղաքում ազգայնականների երթի ժամանակ ոստիկանության հետ բախումների արդյունքում մահացել էր մեկ մարդ: Իսկ ահա նախօրեին Բոստոն քաղաքում ռասիզմի դեմ բողոքի ակցիային մասնակցել է ավելի քան 40 000 մարդ: