ԱՄՆ-ում ԿԺԴՀ-ի հետ հարաբերությունների սրման ֆոնին 90%-ով ավելացել է բունկերների վաճառքը
Ամերիկյան Rising S ընկերությունը, որը ստորգետնյա ապաստարաններ է կառուցում, հայտարարել է վերջին երկու շաբաթվա ընթացքում վաճառքի ավելացման մասին՝ Վաշինգտոնի եւ Փհենյանի հարաբերությունների սրման ֆոնին։ Այս մասին հաղորդում է «ՌԻԱ Նովոստի»-ն՝ վկայակոչելով Fox News հեռուստաալիքը։
Ընկերության մենեջեր Գարի Լինչի խոսքով՝ բունկերների վաճառքն ավելացել է հատկապես Ճապոնիայում։ Վաճառքի ցուցանիշն ավելացել է նաեւ ԱՄՆ-ում՝ ԿԺԴՀ-ի միջմայրցամաքային բալիստիկ հրթիռների մասին լուրերից հետո։
Ընկերության կայքում ներկայացված է բունկերների ուղեցույցը, որտեղ առկա են տարբեր չափերի ու տարբեր արժողությամբ բունկերներ։ Այսպես, 8-12 մետր տարածքով, մեկ սենյակից բաղկացած բունկերն արժե 39.5 հազար դոլար։ Իսկ բնակարանի եւ նույնիսկ ամբողջական համալիրի չափերի հասնող բունկերների արժեքը կարող է գերազանցել 8 մլն դոլարը։