ՀԴԲ-ն խուզարկություն է իրականացրել Թրամփի ընտրական շտաբի նախկին ղեկավարի տանը
ՀԴԲ գործակալները Վիջինիա նահանգում խուզարկություն են իրականացրել Դոնալդ Թրամփի ընտրական շտաբի նախկին ղեկավար Փոլ Մանաֆորթին պատկանող տանը։ ABC հեռուստաընկերության աղբյուրներն ԱՄՆ իրավապահ մարմիններում հայտնել են, որ օրդերը տրամադրվել է երկու շաբաթ առաջ՝ 2016-ի նախագահական քարոզարշավին Ռուսաստանի միջամտության հետաքննության շրջանակում, փոխանցում է «Ամերիկայի ձայնը»։
Փոլ Մանաֆորթի ներկայացուցիչն ամերիկյան լրատվամիջոցներին հաստատել է խուզարկության իրականացման փաստը։ «ՀԴԲ գործակալներն օգտագործել են պարոն Մանաֆորթին պատկանող տներից մեկում խուզարկության օրդերը,- ասվում է հայտարարության մեջ,- Պարոն Մանաֆորթը մշտապես համագործակցում է իրավապահ մարմինների ու այլ պաշտոնական կառույցների հետ ու արել է դա նաեւ տվյալ դեպքում»։
Հուլիսին Փոլ Մանաֆորթը գրանցվել է որպես «օտերարկրյա գործակալ», պաշտոնապես ԱՄՆ իշխանություններին տեղեկացրել է այն մասին, որ անցյալում ինքն աշխատել է Ուկրաինայի կառավարության համար։ Նա ստիպված է եղել Թրամփի ընտրական շտաբում իր պաշտոնը թողնել անցած տարվա օգոստոսին, մի շարք սկանդալներից հետո, որոնք կապակցված էին Եվրոպայի ու նախկին Խորհրդային միության երկրներում նրա բիզնես գործունեության հետ։