Հայաստանի ֆրանսիական համալսարանում հարգեցին զոհված ուսանողների հիշատակը (Լուսանկարներ)

Հայաստանի Ֆրանսիական համալսարանում հունվարի 20-ի երեկոյան տեղի ունեցավ 44-օրյա պատերազմում զոհված ուսանողներ Արեգ Գեւորգյանի, Աբգար Նազարյանի  եւ Սուրեն Եսայանի հիշատակին նվիրված մոմավառության արարողությունը:

Ֆրանսիական համալսարանի զոհերն ավելի շատ են: Մինչ այս տեղի էր ունեցել Շանթ Նավոյանի, Դավիթ Պողոսյանի, Արտակ Սարգսյանի եւ Պարգեւ Տերոյանին նվիրված արարողությունը:

Հիմա էլ, հիշեցին բոլորին: ՀՖՀՀ ռեկտոր Բերտրան Վենարը դիմելով հավաքված ծնողներին, դասախոսներին, ուսանողներին ասաց, որ երբեք չէր մտածի, որ Հայաստան ժամանելուց ընդամենը յոթ օր հետո կսկսվի Արցախյան երկրորդ պատերազմը, եւ որ ինքը զոհված ուսանողների անունը ձեռքին պետք է հիշատակի միջոցառումներ անցկացնի:

Նա ընդգծեց, որ Հայաստան աշխատանքի անցնելու որոշում կայացնելիս հիշել է, որ իր պապը Առաջին աշխարհամարտին կռվել է թուրքերի դեմ: Ռեկտորը նշեց, որ իր համար կարեւոր հանգամանք է եղել նաեւ ֆրանսահայ ընկերների, ծանոթների բարեվարքությունը: «Նրանք հրաշալի մարդիկ են»,- ասաց նա:

Դիմելով զոհված ուսանողների ծնողներին նա ընդգծեց, որ խոսքերը երբեք բավարար չեն լինի ձեր կորստի ցավը մեղմելու համար: «Աբգարը ՀՖՀՀ ընդունվեց 2020թ. եւ անմիջապես մեկնեց զինվորական ծառայության: Երբ լսեցինք նրա զոհվելու լուրը, հույզերը խեղդեցին մեզ»,- ավելացրեց նա եւ շարունակեց. «Շանթ, Դավիթ, Արտակ, Պարգեւ, Արեգ, Սուրեն, Աբգար, շնորհակալություն ձեզ, շնորհակալություն ձեր ծնողներին, մենք երջանիկ ենք, որ դուք մեր ուսանողներն եք»:

Բերտրան Վենարն ասաց, որ համալսարանի նորաբաց լսարաններից մեկում, որի պատուհանները նայում են քաղաքին, տեղադրվելու են զոհված ուսանողների լուսանկարները եւ գրվելու են նրանց անունները: «Դա յուրատեսակ խորհուրդ է պարունակում: Լուսանկարում զինվորներից մեկը՝ Աբգարը քաղաքացիական հագուստով է՝ ազգային դրոշը ձեռքին: Սա եւս խորհուրդ է եւ դեպի առաջ շարժվելու պատգամ»,- ասաց ռեկտորը, շեշտելով, որ եթե այսուհետ որեւէ մեկը կտրտնջա առօրեական հոգսերից, խնդիրներից, ապա թող հիշի Շանթին, Դավիթին, Արտակին, Պարգեւին, Արեգին, Սուրենին, Աբգարին:

Այնուհետեւ տեղի ունեցավ մոմավառության արարողությունը, որին մասնակցեցին սրահում գտնվողները: Ռեկտորը շեշտեց, որ տղաներն իրենց սրտերում են եւ միշտ լինելու են համալսարանի կյանքում:

Top-News.am