ՀՀ իշխանությունը անօդաչու սարք է, որի թիրախը Արցախի հերոսներն են. Արամ Հարությունյան

Այն, որ Մարգարիտա Սիմոնյանը հստակ դիրքորոշում ուներ Հայաստանի իշխանությունների նկատմամբ, դա վաղուց է հայտնի, դեռ 2018 թվականին, երբ նա պարզել էր, որ Հայաստանում իշխանական թիմի ներկայացուցիչները սեմինարներ են անցկացնում, թե ինչպես կարելի է Ռուսաստանում իշխանափոխություն իրականացնել: Այս մասին այսօր՝ հուլիսի 23-ին, լրագրողների հետ հանդիպման ժամանակ ասաց «Ազգային համաձայնություն» կուսակցության նախագահ Արամ Հարությունյանը՝ խոսելով հայ-ռուսական հարաբերությունների, Ռուսաստանից եկող ազդակների, սահմանային լարվածության մասին:

«Բացի այդ մենք միշտ տեսել ենք, որ եւ´ Պուտինի շուրթերով, եւ´ Լավրովի, մի քանի անգամ այս իշխանությունների պահվածքի հետ կապված հստակ ասվել է, բայց Մարգարիտա Սիմոնյանի ասածը ամփոփումն էր այդ ամենի, իհարկե ավելի կոնկրետ տոնայնությամբ էր»,- ասաց Արամ Հարությունյանը:

Շարունակելով խոսել լրագրող, RT–ի եւ նրա գլխավոր խմբագիր Մարգարիտա Սիմոնյանի վերջին օրերի հայտարարությունների մասին, Արամ Հարությունյանը ասաց. «Նկատի ունենալով իր դիրքն ու մասնագիտական ազդեցությունը, հասկանալի է, բայց մի բան պարզ է, որ Մարգարիտա Սիմոնյանը այն մարդը չէ, որն աներ մի քայլ՝ չմտածելով որ Կրեմլից կարող են վատ ընդունել դա: Բայց անցավ ժամանակ եւ այնտեղից ոչ մի վատ արձագանք չեղավ: Մարգարիտա Սիմոնյանի ասածը հստակ է, քանի որ այս իշխանությունը առաջին օրվանից երեք խնդիր է դրել իր առաջ, դա հակառուսականությունն է, նրանց բազաններն այստեղից հանելը, հարաբերությունները փչացնելը»:

Հարությունյանի խոսքով՝ բանն անգամ հասել է նրան, որ իշխանության ներկայացուցիչները եւ նրանց սատարողները հայտարարում են, որ Հայաստանը տարածաշրջանում ունի 3 թշնամի՝ Թուրքիա Ադրբեջան եւ Ռուսաստան. «Մենք հասկանում ենք, որ իշխանության թիմում կան մարդիկ, այդ թվում նաեւ Նիկոլ Փաշինյանը, որոնք վարում են հակառուսական քաղաքականություն, Փաշինյանի ամբողջ կենսագրությունն է հակառուսական»:

Հարությունյանը նշում է, որ Ռուսաստանը սկզբում ուզում էր հասկանալ, թե ինչ քաղաքականություն է վարում նոր իշխանությունը, թեեւ ամենասկզբից էլ գիտեր նրանց քաղաքականության մասին:

Արամ Հարությունյանը ասում է, որ դեռ ամենասկզբից իշխանության գալուց հարձակում եղավ ՀԱՊԿ-ի վրա, փորձեցին վարկաբեկել գլխավոր քարտուղարին:

«Մարգարիտա Սիմոնյանի ասածը ամփոփումն էր Հայաստանի ընդդիմադիր ներկայացուցիչների, ուղղակի տարբեր տոնայնությամբ ու ձեւով ասված:

Այդ հարաբերությունները աննախադեպ վատ են:

Բայց Ռուսաստանը երբեք մի անհավասարակշիռ մարդու համար չի վտանգի իր շահերը: Իր զսպվածությունը շատ անգամ պայմանավորված է հենց դրանով, բայց այսօր Հայաստանի իշխանությունը անօդաչու սարք է, որի թիրախը նորից Արցախի հերոսներն են, ռուսական հարաբերությունները, տեսնում ենք, որ այս նրանք ամեն դեպքում փորձում են նաեւ սադրելով փչացնել հարաբերությունները»,- ասաց Արամ Հարությունյանն ու հավելեց, որ Ռուսաստանը մեկ օրվա պետություն չէ, կամ մի քանի տարվա, նրանք լուրջ փորձագետներ ունեն. «Վլադիմիր Պուտինի կողքին շատ խելոք ու պրոֆեսիոնալներ կան, որոնք գիտեն Նիկոլ Փաշինյանի ցանկացած քայլ»:

Անդրադառնալով Տավուշում սահմանային լարվածությանը եւ այս օրերին գեներալ-մայոր Գրիգորի Խաչատուրովի կատարած գործողություններին, նա նշեց.

«Զավեշտական է, երբ Նիկոլ Փաշինյանը Գրիգորի Խաչատուրովի հորը դատում է, իսկ Գրիգորի Խաչատուրովը այս օրերին պաշտպանում է Փաշինյանի ծնողներին:

Հասկանում ենք, որ գործ ունենք մարդու հետ, որի դահիճն իր ներսում է, նա ինքն իրեն տանում է դեպի կործանման, այսինքն քաղաքական ինքնասպանություն է գործում եւ համոզված եմ, որ այդ ժամանակը շատ շուտ է գալոց, նա 2021 թվական չի հասնելու»: