Ռուսաստանը պատրաստ է Եվրոպայի հետ միասին գործել. Պուտին

Ռուսաստանի նախագահ Վլադիմիր Պուտինը հայտարարել է, որ Ռուսաստանը պատրաստ է Եվրոպայի կողքին կանգնել, ինչպես ժամանակին ցանկանում էր Գերմանիայի` կյանքից հեռացած կանցլեր Հելմուտ Կոլը:

Ինչպես նշում է Gazeta.ru-ն` Պուտինի խոսքով`Կոլն ասում էր, որ «եթե մենք ցանկանում ենք պահպանել մեր քաղաքակրթությունն այս բուռն և արագ կերպով զարգացող ու փոփոխվող աշխարհում, ապա, իհարկե, Եվրոպան և Ռուսաստանը պետք է միասին լինեն»:

«Ես լիովին համաձայն եմ նրա հետ: Դուք գիտեք մեր դիրքորոշումը, այն է, որ մենք պատրաստ ենք: Պետք է, որ մեր գործընկերները նույնպես պատրաստ լինեն, որպեսզի ձերբազատվեն անցյալի վախերից», - ընդգծել է ՌԴ առաջնորդը:

Պուտինը պատմել է նաև իր քաղաքական հայացքների վրա Կոլի ազդեցության մասին:

Հիշեցնենք, որ Գերմանիայի նախկին կանցլեր Հելմուտ Կոլի մահվան մասին հայտնի է դարձել հունիսի 16-ին: Գերմանիայի միավորմանը նպաստած գործիչը մահացել է 87 տարեկան հասակում:

tert.am