Քաթարը ճգնաժամի ֆոնին մթերքի ներմուծման շուրջ բանակցություններ է վարում Թուրքիայի և Իրանի հետ
Քաթարը ճգնաժամի ֆոնին սննդամթերքի ներմուծման հարցի շուրջ բանակցություններ է վարում Թուրքիայի և Իրանի հետ, այս մասին հայտնում է demokrathaber.org կայքը:
Քաթարի համար սննդի հիմնական մատակարարներ հանդիսացող Սաուդյան Արաբիայի և Արաբական Միացյալ Էմիրությունների հետ դիվանագիտական հարաբերությունների խզումից և օդային հաղորդակցության դադարեցումից հետո Թուրքիան և Իրանը դիտարկվում են որպես հիմնական այլընտրանք սննդի մատակարարման հարցում:
Հայտնի է, որ Թուրքիայի նախագահ Ռեջեփ Թայիփ Էրդողանն արդեն հանձնարարականներ է տվել համապատասխան նախարարություններին պատրաստություններ սկսել սննդի ու ջրի մատակարարումները կազմակերպելու համար: Մատակարարումները կիրականացվեն քաթարական ավիաուղիների բեռնատար ինքնաթիռներով:
Իր հերթին, Թուրքիայի արտահանողների միության նախագահ Մեհմեթ Բույուքելչին հանդես է եկել հայտարարությամբ, որ իրենք լիովին պատրաստ են բավարարել Քաթարի բնակչության սննդամթերքի և խմելու ջրի պահանջները:
Հիշեցնենք, որ օրեր առաջ Սաուդյան Արաբիան, Եմենը, Եգիպտոսը, Արաբական Միացյալ Էմիրությունները, Լիբիան, Մալդիվներն ու Բահրեյնը խզել են Քաթարի հետ դիվանագիտական կապերը: Բացի այդ, Քաթարը հեռացվել է Սաուդյան Արաբիայի գլխավորած և Եմենում գրոհայինների դեմ կռվող կոալիցիայից: Նախօրեին Քաթարի դեմ արշավին միացել են նաև այլ երկրներ։