Լուկաշենկոն բլոգեր Լապշինին Ադրբեջանին չհանձնելու հիմնավորում չի տեսնում

Բելառուսը հիմնավորում չունի, որպեսզի Ադրբեջանին չհանձնի ռուս-իսրայելցի բլոգեր Ալեքսանդր Լապշինին: «ՌԻԱ Նովոստի»-ի փոխանցմամբ՝ այս մասին հայտարարել է Բելառուսի նախագահ Ալեքսանդր Լուկաշենկոն:

«Նրան Ադրբեջանին չհանձնելու ի՞նչ հիմնավորումներ ունենք: Ոչ մի»,- ասել է Լուկաշենկոն Մինսկում կայացած մեծ մամուլի ասուլիսի ժամանակ:

Նրա խոսքով՝ Լապշինի ձերբակալությունն իրականացվել է Ինտերպոլի որոշման համաձայն: «Բոլոր օրենքների եւ կարգերի համաձայն՝ նրան պետք է Ադրբեջանին հանձնել: Իհարկե, մենք կարող ենք նրան ընդհանրապես ազատել, բայց դա ճիշտ չի լինի: Ճիշտ նույնկերպ կվարվեն մեզ հետ, եթե ինչ-որ մեկին ձերբակալելու լինենք: Հետեւաբար՝ բոլոր համաձայնագրերով նրան պետք է Ադրբեջանին հանձնել»,- հավելել է Լուկաշենկոն:

Դեկտեմբերի կեսին Լապշինը, որը նաեւ ՌԴ քաղաքացի է, Մինսկում ձերբակալվել էր Ադրբեջանի հարցումով, որտեղ նրան ԼՂՀ այցելության համար ընդգրկել էին «սեւ ցուցակում»։ Լապշինը, սակայն, 2015-ին Վրաստանի տարածքով եւ Ուկրաինայի քաղաքացու անձնագրով մտել էր Ադրբեջան այն բանի շնորհիվ, որ նրա անվան գրության մեջ տառի տարբերություն կա։ Ուկրաինական անձնագրում գրված է «Օլեկսանդր»։ Դրանից հետո Ադրբեջանը բլոգերի նկատմամբ միջազգային հետախուզում էր հայտարարել՝ «Պետական սահմանի մասին» օրենքը խախտելու համար:

Հունվարի 17–ին Բելառուսի դատախազությունը որոշել էր բավարարել Ադրբեջանի պահանջը եւ արտահանձնել Լապշինին Ադրբեջանին։ Իսկ հունվարի 26–ին Մինսկի դատարանը մերժել էր Լապշինի փաստաբանների բողոքը:

Լուրեր Հայաստանից - NEWS.am