Ավստրալիային առնվազն մեկ դար է հարկավոր հրդեհներից վերականգնվելու համար (լուսանկարներ)

Ավստրալիայից 100 տարի կպահանջվի անցյալ աշնանից սկսված զանգվածային անտառային հրդեհներից վերականգնվելու համար: Այս մասին տեղեկացնում է The Sun թերթի կայքը:

Հրշեջ ծառայությունների տվյալներով` հենց այդքան ժամանակ պետք կգա, որպեսզի Ավստրալիան վերադառնա այն վիճակին, ինչպիսին էր մինչ հրդեհները:

Միացյալ Նահանգների Օդագնացության և տիեզերական տարածության հետազոտությունների ազգային գործակալության` ՆԱՍԱ-ի տվյալներով` հրդեհներից առաջացած ծուխը մի ամբողջ շրջապտույտ կիրականացնի մոլորակի շուրջը, ինչը կնպաստի մթնոլորտի աղտոտմանն ամբողջ աշխարհում:

Բացի այդ, Նոր Զելանդիայի երկինքը փոխել է գույնը` առաջացնելով օդի որակի հետ կապված լուրջ մտահոգություններ: Սպասվում է, որ ավելի սառը եղանակային պայմաններն ու անձրևները կօգնեն պայքարել օդի աղտոտվածության դեմ:

Վայրի բնության համաշխարհային հիմնադրամը տեղեկացրել է Ավստրալիայի կառավարությանը, որ 13 տեսակի կենդանիների բնակավայրերը կա՛մ վերացել են, կա՛մ լուրջ վնասներ են կրել:

Տևական ժամանակ Ավստրալիան պատուհասած ուժգին անտառային հրդեհներն ավելի քան 1 մլրդ կենդանիների սատկելու պատճառ են դարձել: Սիդնեյի համալսարանի պրոֆեսոր Քրիս Դիքմանը պարզել է, որ միայն Նոր Հարավային Ուելս նահանգում անտառային հրդեհների զոհ է դարձել ավելի քան 800 մլն կենդանի:

Դիքմանի ներկայացրած թվերը հիմնված են Վայրի բնության համաշխարհային հիմնադրամի՝ 2007թ. զեկույցի վրա, և չի բացառվում, որ իրականում սատկած կենդանիների թիվը շատ ավելին լինի:

Անտառային հրդեհների հետևանքով Ավստրալիայում այրվել է մի քանի միլիոն հեկտար մակերեսով տարածություն, ոչնչացվել է հազար տուն, զոհվել` 17 մարդ: