Հայտնի են դարձել տասնամյակի ամենաթանկարժեք հարսանիքները

Բրիտանական Bridebook գործակալությունը, որը զբաղվում է հարսանիքների կազմակերպմամբ, հրապարակել է վերջին 10 տարիների ամենաթանկարժեք հարսանիքների ցանկը:

Ինչպես գրում է The Sun պարբերականը, առաջին տեղում է հայտնվել Մեծ Բրիտանիայի արքայազն Հարիի և ամերիկացի նախկին դերասանուհի Մեգան Մարքլի հարսանյաց տոնակատարությունը: 2018-ի մայիսի 19-ին կայացած հանդիսությունը 35 մլն ֆունտ ստերլինգ է արժեցել: Միայն հարսանեկան զգեստի համար Մեգանը 420 000 ֆունտ է վճարել:

Երկրորդը ցանկում Հարիի եղբոր՝ արքայազն Ուիլյամի և Քեյթ Միդլթոնի հարսանյաց հանդեսն է, որը տեղի է ունեցել 2011-ի ապրիլի 29-ին: Հարսանիքին արքայական զույգը 26 մլն ֆունտ ստերլինգ է ծախսել:

Առաջատար եռյակում հայտնվել է «Ֆորմուլա 1»-ի նախագահ Բերնի Էքլսթոունի դստեր՝ Պետրայի և գործարար Ջեյմս Սթենթի հարսանիքը 2011-ին, որն արժեցել է 9 մլն ֆունտ ստերլինգ: Նշենք, որ 7 տարի անց զույգն ամուսնալուծվել է:

Հաջորդիվ ցանկում ներկայացվել են երաժիշտ Ջասթին Թիմբերլեյքի և դերասանուհի Ջեսիկա Բիլի հարսանիքը 2012-ին՝ 4 մլն ֆունտ արժողությամբ և 2014-ին կայացած դերասան Ջորջ Քլունիի և իրավաբան Ամալ Ալամուդինի հարսանիքը՝ 3.5 մլն ֆունտ արժողությամբ:

Ամենաթանկարժեք հարսանիքների ցանկում տեղ գտած զույգերի հաջորդ եռյակը հետևյալ տեսքն ունի. ԱՄՆ նախկին նախագահ Բիլ Քլինթոնի դուստր Չելսի Քլինթոնի և բանկիր Մարկ Մեզվինսկու հարսանիքը (2.3 մլն ֆունտ), դերասանուհի Պրիանկա Չոպրայի և երգիչ Նիք Ջոնսոնի հարսանիքը (2.3 մլն ֆունտ) և Քիմ Քարդաշյանի ու ռեփեր Քանյե Ուեսթի հարսանիքը (2.1 մլն ֆունտ):

Բաժանորդագրվեք Top-News.am-ին Telegram-ում