Թրամփը նոր պատժամիջոցներ կսահմանի Իրանի նկատմամբ

Միացյալ Նահանգների նախագահ ը պատրաստվում է նոր պատժամիջոցներ սահմանել Իրանի նկատմամբ, որի վարքը, ըստ Սպիտակ տան, ապակայունացնում է իրավիճակը տարածաշրջանում: Այս մասին հաղորդում է Reuters-ը՝ վկայակոչելով քաջատեղյակ աղբյուրներին:

Գործակալությունը հիշեցնում է, որ Թրամփը հունվարի 20-ին կայացած երդմնակալության արարողությունից հետո անդրադարձել էր Իրանի թեմային՝ հասկացնելով, որ բավականին կոշտ է տրամադրված այդ երկրի դեմ ու չի բացառում դեպքերի հետագա զարգացման ոչ մի սցենար:

Այժմ քաջատեղյակ աղբյուրները հաղորդում են, որ Թրամփը պատրաստվում է պատժամիջոցներ սահմանել 2 տասնյակից ավելի իրանական «օբյեկտների» նկատմամբ: Ակնկալվում է, որ Միացյալ Նահանգների նախագահը համապատասխան հայտարարությամբ հանդես կգա ուրբաթ:

Նշվում է, որ պատժամիջոցները, որոնք չեն հակասում 2015թ. Թեհրանի և «միջնորդ 6-յակի» միջև կնքված պատմական միջուկային համաձայնագրին, կվերաբերեն ինչպես ընկերություններին, այնպես էլ անհատներին:

Ինչպես ավելի վաղ հայտնել էր Tert.am-ը, Թրամփի ազգային անվտանգության հարցերով ավագ խորհրդական Մայքլ Ֆլինը հայտարարել էր, որ նախագահի վարչակազմն «աչքի տակ է առել» Իրանը՝ այդ երկրի կողմից վերջերս իրականացված հրթիռային փորձարկման առնչությամբ: Ֆլինը մանրամասնել էր, որ Իրանի վերջին գործողությունները դրդել են Սպիտակ տանն «աչքի տակ պահել» իսլամական հանրապետությանը, որի դեմ կնախաձեռնվեն պատասխան քայլեր:

Սպիտակ տանը կայացած ճեպազրույցի ժամանակ Թրամփի խորհրդականն ասել էր, որ հրթիռի կիրակնօրյա արձակումը, ինչպես նաև Իրանի աջակցությունը վայելող հութի զինյալների կողմից հունվարի 30-ին սաուդյան ռազմանավի դեմ իրականացված հարձակումն անվստահություն են ներշնչում Իրանի նկատմամբ:

Մինչ Ֆլինը խուսափել է Վաշինգտոնի պատասխան քայլերի վերաբերյալ պարզաբանումներ տալուց, Սպիտակ տան մամուլի խոսնակ Շոն Սփայսերն ասել էր, որ «նախագահ Թրամփն ուզում է իրանցիներին հասկացնել, որ Վաշինգտոնը չի պատրաստվում նստել ու լուռ հետևել նրանց գործողություններին»:

tert.am