Էլիզաբեթ 2-րդն ինքնուրույն է դիմահարդարվում և զգեստների ընտրության հարցում լսում է ամուսնու խորհուրդները. հետաքրքիր փաստեր (լուսանկարներ)

«Մետաղադրամի հակառակ կողմը: Թագուհին, դերձակը և զգեստապահարանը» գրքում բրիտանական թագավորական տան դերձակ Անջելա Քելլին հանրությանն է ներկայացրել թագավորական ընտանիքի և մասնավորապես՝ Մեծ Բրիտանիայի թագուհի Էլիզաբեթ 2-րդի կյանքի հետաքրքիր դրվագներն ու պատմությունները:

Թագավորական տան դերձակն իր գրքում պատմել էր, թե ինչ ոգևորությամբ էր Էլիզաբեթ 2-րդն ընդունել Օլիմպիական խաղերին նվիրված հոլովակին Ջեյմս Բոնդի դերակատարի հետ համատեղ մասնակցելու գաղափարը, ինչպես նաև բացահայտել էր, որ բրիտանական թագավորական տան ժառանգների մկրտության զգեստները ներկվում են Յորքշիրի թեյով:

Դերձակի գրքում տեղ են գտել նաև Մեծ Բրիտանիայի միապետի վերաբերյալ այլ հետաքրքիր և անհայտ փաստեր, որոնք ներկայացնում է Insider-ը.

 Թագուհուն ողջունելու կարգն այնքան էլ խիստ չէ, որքան մարդիկ կարծում են

ԱՄՆ նախկին առաջին տիկին Միշել Օբաման 2009 թվականին իր ձեռքը դրել էր թագուհու ուսին՝ հակասությունների ալիք բարձրացնելով հանրության և էթիկետի մասնագետների շրջանում: Թեև Նորին Մեծությունը պատասխան արձագանք էր տվել Միշել Օբամայի ջերմ քայլին, շատերի կարծիքով՝ նախկին առաջին տիկինը խախտել էր թագավորական կարգը:

«Իրականում, դա թագուհու կողմից բնական արձագանք էր՝ իր դիմաց կանգնած հիանալի կնոջը հարգանքի և համակրանքի դրսևորման քայլ»,- գրում է դերձակը և հավելում, որ ոչ մի կանոն չի կարող սահմանափակել այդ քայլը:

«Հակառակ հանրության շրջանում տարածված կարծիքի՝ թագուհու հետ ծանոթության ժամանակ հատուկ խիստ կանոններ գոյություն չունեն: Ըստ ցանկության՝ կարող եք խոնարհվել, կամ չխոնարհվել: Բայց, որպես կանոն, մարդիկ խոնարհվում կամ գլուխ են տալիս՝ հարգանքից ելնելով»,- գրում է Քելլին:

 Էլիզաբեթ 2-րդը սիրում է ինքնուրույն շպարվել

Թվում է, թե լինելով Մեծ Բրիտանիայի ամենակարևոր դեմքը՝ Էլիզաբեթ 2-րդին պետք է շպարեին պրոֆեսիոնալ դիմահարդարները, սակայն պարզվում է՝ թագուհին սիրում է ինքնուրույն շպարվել, գրում է աղբյուրը:

Անջելա Քելլիի խոսքով՝ թագուհին տարվա մեջ դիմահարդարի կողմից շպարվում է միայն մեկ անգամ՝ հեռուստատեսությամբ ամանորյա ուղերձի ժամանակ:

«Գուցե ցարմանաք, բայց դա տարվա մեջ միակ իրադարձությունն է, որի ժամանակ Նորին Մեծությունն ինքնուրույն չի դիմահարդարվում»,- հայտնում է Քելլին:

 Արքայազն Ֆիլիպը թագուհուն զգեստների ընտրության վերաբերյալ խորհուրդներ է տալիս. նա նույնիսկ մի անգամ համոզել է վերջինիս՝ գլխարկը հակառակ կողմով կրել

1998 թվականին Մալայզիա այցելության ժամանակ, երբ նախատեսված էր Էլիզաբեթ 2-րդի այցը «Ազգերի համագործակցություն» խաղերի (Commonwealth Games- «Ազգերի բրիտանական համագործակցություն» կազմակերպության անդամ պետությունների շրջանում անցկացվող մարզական միջոցառումներ) փակման արարողությանը, Քելլին թագուհուն հայտնել է, որ նրա ընտրած գլխարկը «չի համապատասխանում նրան»:

Դերձակն Էլիզաբեթ 2-րդին խորհուրդ է տվել այն շրջած կրել:

Քելլիի խոսքով՝ թագուհին չի համաձայնել գլխարկը կրել այդպես այնքան ժամանակ, մինչև չի ստացել ամուսնու համաձայնությունը:

 Մեծ Բրիտանիայի միապետը, անկախ ամեն ինչից, յուրաքանչյուր կիրակի եկեղեցի է այցելում

«Ինչպիսին էլ որ լինի Նորին Մեծության գրաֆիկը, նա շաբաթվա վերջում Վինձոր ամրոց է գնում և ամեն կիրակի այցելում եկեղեցի՝ անկախ այն հանգամանքից՝ քաղաքում է, թե ոչ»,- վստահեցնում է թագավորական տան դերձակը:

Այս թեմայով Արքայազն Չարլզը դադարել է ֆինանսավորել Հարիին ու Մեգան Մարքլին Բրիտանական թագավորական ընտանիքի կայքից ջնջվել են Մեգան Մարքլի, արքայազններ Հայրիի եւ Էնդրյուի հաշիվները Բացահայտվել է, թե ով է արքայական ընտանիքի ամենագեղեցիկ կինը Հարին և Մեգանը վերադառնում են Մեծ Բրիտանիա Արքայազն Ֆիլիպը կորոնավիրուսի պատճառով ծննդյան 99-ամյակին խուսափել է մեծ խնջույքից, հրավառությունից