Բիլ Մյուրեյը խոստովանել է, որ ընդունվել է աշխատանքի արագ սննդի կետում

Հոլիվուդյան դերասան Բիլ Մյուրեյը խոստովանել է, որ հետաքրքրության համար դիմել է արագ սննդի կետում աշխատանքի համար, և շատ է զարմացել, երբ իրեն ընդունել են աշխատանքի, գրում է Daily Mail-ը:

69-ամյա դերասանն այդ մասին խոստովանել է հոլիվուդյան դերասանուհի Էմի Շումերի փոդքասթի (աուդիոֆայլերից կազմված հաղորդաշար) ժամանակ:

«Ատլանտայի օդանավակայանում լրացրի P.F. Chang-ի (ամերիկյան ռեստորան) աշխատանքի հայտի թերթիկը, քանի որ այն, ըստ իս, ամենահիանալի տեղերից մեկն է»,- հայտնել է դերասանը:

Բիլ Մյուրեյը հավելել է, որ արագ սննդի ռեստորանն իր դիմումին արձագանքել է Twitter-ում՝ գրելով, որ նա ընդունված է աշխատանքի:

«Բիլ, դուք ընդունված եք: Ե՞րբ կարող եք անցնել աշխատանքի»,- գրառում է կատարել ընկերությունը:

Ցավոք Բիլը, ըստ երևույթին, չի կարողանա ստանձնել երկրորդ աշխատանքը, քանզի այս տարին դերասանի համար ֆիլմաշատ էր, գրում է աղբյուրը:

2020 թվականին կթողարկվի դերասանի մասնակցությամբ միանգամից երեք ֆիլմ՝ «Ուրվականների որսորդները-2020» (Ghostbusters), «Ֆրանսիացի դիսպետչերը» (The French Dispatch) և On the Rocks-ը: