Լավրով. «Մոսկվան պատրաստ է համագործակցել ԱՄՆ–ի հետ Սիրիայի հարցով»
Ռուսաստանի ԱԳ նախարար Սերգեյ Լավրովը հայտարարել է, որ Մոսկվան պատրաստ է համագործակցել ԱՄՆ–ի հետ սիրիական կարգավորման հարցով։
Այս մասին նա հաղորդել է իր հորդանանյան գործընկերոջ՝ Այման աս–Սաֆադիի հետ բանակցությունների ժամանակ։
«Մենք բազմիցս լսել ենք Նորին Գերազանցություն թագավոր Աբդալլա II-ից այն մասին, որ սիրիական կարգավորման ուղղությամբ միջազգային հանրության գործողությունների էֆեկտիվության համար սկզբունքային նշանակություն ունի Ռուսաստանի եւ ԱՄՆ–ի միջև փոխգործակցությունը։ Կարող եմ ձեզ հավաստիացնել, որ մենք դրան ամբողջովին պատրաստ ենք։ Հույս ունենք, որ նման մոտեցում կցուցաբերվի նաեւ Վաշինգտոնի կողմից»,– ասել է Լավրովը։
Ավելի վաղ հաղորդվել էր, որ ՄԱԿ–ում ԱՄՆ մշտական ներկայացուցիչ Նիկի Հեյլին կոչ էր արել ճնշում գործադրել Ռուսաստանի վրա՝ Սիրիայում հակամարտության լուծման գործողությունների շրջանակներում։