Եվրամիությունը ընդունում է Թուրքիայի հանրաքվեի արդյունքները
Եվրամիությունը ընդունում է Թուրքիայում հանրաքվեի արդյունքները եւ հետաքրքրված է երկրի կայունությամբ,– հայտարարել է ԵՄ դիվանագիտության ղեկավար Ֆեդերիկա Մոգհերինին՝ ԵՄ անդամ երկրների ԱԳ ղեկավարների` Թուրքիայի վերաբերյալ քննարկումների ոչ պաշտոնական նիստից հետո։
«Առաջին հերթին մենք հարգում եւ ընդունում ենք ցանկացած երկրի, այդ թվում Թուրքիայի ինքնիշխանության իրավունքը՝ որոշել կառավարման համակարգի տեսակը, ինչպես դա արեց Թուրքիան հանրաքվեի միջոցով՝ սահմանադրական փոփոխություններով»,– հայտարարել է Մոգհերինին լրագրողներին։
«ԵՄ–ն շահագրգռված է, որ Թուրքիան լինի կայուն, անվտանգ, տնտեսապես հաջողակ եւ դեմոկրատ, որը Եվրոպայի համար նշանակալի գործընկեր եւ նշանակալի խաղացող է որոշ հարցերում։ Մենք նպատակ չունենք եւ երբեւէ չենք պատրաստվում այնպիսի բան անել, որը կվնասի Թուրքիային կամ թուրք ժողովրդին»,– ասել է ԵՄ դիվանագիտության ղեկավարը։