Թրամփը իջեցնում է հարկերը
ԱՄՆ նախագահ Դոնալդ Թրամփը մտադիր է ապրիլի 26-ին հայտարարել հարկային բարեփոխման եւ հարկային բեռի իջեցման մասին։ Այս մասին նա հայտարարել է Twitter-ի իր պաշտոնական էջում։
«Հարկային մեծ բարեփոխման եւ հարկերի իջեցման մասին կհայտարարվի չորեքշաբթի՝ ապրիլի 26-ին»,– գրել է նախագահը։
Անցած ուրբաթ Թրամփը ստորագրել է մի շարք փաստաթղթեր, որոնք վերաբերում են երկրում գործող հարկային օրենքներին։ Մասնավորապես, խոսքը գնում է կատարողական հրամանի մասին, որը ֆինանսների նախարարությանը առաջադրանք է տալիս վերանայել հարկային օրենքները, որոնք գործարկվել են Բարաք Օբամայի պաշտոնավարման ընթացքում։
Ինչպես ավելի վաղ հայտարարել էր ԱՄն ֆինանսների նախարար Սթիվեն Մնուչինը, այժմ իր աշխատակիցները կփորձեն պարզել այն օրենքներն ու նորմերը, որոնք շարքային ամերիկացիների եւ բիզնեսի չհիմնավորված ծանրաբեռնվածության պատճառ են դարձել։
Բացի այդ, գնահատական կտրվի արտասահմանում տեղակայված ամերիկյան կազմակերպությունների կարգավորմանը՝ բարձր հարկերից խուսափելու նպատակով։ Այդ ուսումնասիրության արդյունքներով ֆինանսների նախարարությունը զեկույց կպատրաստի, որտեղ կնկարագրվեն գոյություն ունեցող խնդիրները, ինչպես նաեւ կառաջարկվեն դրանք լուծելու միջոցները։