Պորոշենկոն Ռուսաստանը համեմատել է կոկորդիլոսի հետ
Ուկրաինայի նախագահ Պյոտր Պորոշենկոն, Լոնդոն այցի ժամանակ, Ռուսաստանը համեմատել է կոկորդիլոսի հետ` մեջբերելով Մեծ Բրիտանիայի նախկին վարչապետ Վինսթոն Չերչիլի խոսքերը։
«Չերչիլը 1942 թվականի հունվարին ասել է. «Ամեն մեկն էլ հույս ունի, որ եթե բավականաչափ կերակրի կոկորդիլոսին, կոկորդիլոսը իրեն մյուսներից ավելի ուշ կուտի»։
Մի տեղ կա, որտեղ այդ խոսքերը հատկապես հրատապ են. դա Ուկրաինան է, եւ այդ կոկորդիլոսը, որին շատերը ուզում են կերակրել, որպեսզի նա իրենց այսօր չուտի՝ Ռուսաստանն է»,– հայտարարել է Պորոշենկոն։
Նա նաեւ նշել է, որ Ռուսաստանը «երբեք չի կշտանա»։ «Նա չի հավատում դեմոկրատիային եւ մարդու իրավունքներին, նա հավատում է միայն աշխարհի վրա տիրապետությանը եւ ազդեցության ոլորտին»,– նշել է ուկրաինացի առաջնորդը։