ԱՄՆ-ի եւ Մեքսիկայի սահմանին պատի կառուցման արժեքը կկազմի մոտ 70 մլրդ դոլար
Ամերիկա-մեքսիկական սահմանին պատի շինարարության արժեքը կկազմի գրեթե 66,9 մլրդ դոլար: Այս մասին նշված է երեքշաբթի հրապարակված զեկույցում, որը կազմել են ԱՄՆ Կոնգրեսի ազգային անվտանգության հարցերով եւ կառավարական հաստատությունների գործերով կոմիտեի դեմոկրատ սենատորների օգնականները, որն իրականացնում է այս նախագծի հսկողությունը, փոխանցում է ՏԱՍՍ-ը:
Մղոնի (1,6 կմ) համար 36,6 մլն դոլար արժեքի դեպքում 1827 մղոն (2940 կմ) երկարությամբ պատի արժեքը կարող է 66,9 մլրդ դոլարից անցնել: Այսպիսով, ԱՄՆ-ի յուրաքանչյուր տղամարդը, կինը եւ երեխան պատի շինարարության համար կվճարեն 200 դոլարից ավելի:
Ըստ որում՝ Դեմոկրատական կուսակցության հաշվարկներով պատի ամենամյա վերանորոգման ծախսերի եւ սպասարկման ծախսերը կարող են կազմել 150 մլն դոլար: Զեկույցի հեղինակները ենթադրում են, որ նախագիծը կհանգեցնի բազմամյա դատական վեճերի կառույցի շինարարության տակ հայտնված մասնավոր հողերի գնման պատճառով: ԱՄՆ-ի միգրացիոն եւ մաքսային օրենսդրության վերահսկման եւ հսկողության բյուրոն Կոնգրեսին հայտնել է, որ առայժմ չափազանց վաղ է խոսել այդ հատվածների հնարավոր արժեքի մասին: Զեկույցում ընդգծվում է, որ 2 երկրների սահմանին ամբողջ կառույցի շինարարության արժեքի հավաստի գնահատական ներկայումս գոյություն չունի: