Օլանդ. «Ես փաստեր ունեմ, որ Ասադը քիմիական զենք է օգտագործել»
Ֆրանսիան տվյալներ ունի, որոնք հաստատում են Սիրիայի կառավարական ուժերի մեղքը ապրիլի 4-ին Իդլիբ գավառում կազմակերպված քիմիական գրոհի մեջ։
Այս մասին հայտարարել է Ֆրանսիայի նախագահ Ֆրանսուա Օլանդը՝ «Le Monde» թերթին տված հարցազրույցում։
«Կոնկրետ տվյալ դեպքում մենք համոզված ենք, որ օգտագործվել է քիմիական զենք, որը բաց է թողնվել Շայրաթ բազայից դուրս եկած ինքնաթիռից։ Մեր տեղեկություններով այն պատահաբար կամ անզգուշությունից չի կիրառվել, եւ ոչ էլ ահաբեկչություն անելու նպատակով»,– հայտարարել է նա։
Օլանդի խոսքերով՝ հարվածը հասցվել է «մարտավարական նկատառումներով»։ «Այն ուղղված էր տեղանքի ուժերի վերադասավորման, կորուստներ տալու նպատակով՝ ներառյալ երեխաները, քանի որ հնարավոր չէ տարբերել զինյալներին խաղաղ բնակչությունից։ Ամերիկացիները նույնպես դրանում կասկածներ չունեն»,– ասել է նախագահը։
Ֆրանսիական առաջնորդը նաեւ հերքել է այն տեսակետը, թե ապրիլի 4-ին Իդլիբում կատարված գործողությունները կարող էին սարքված լինել։