Ստոկհոլմի ահաբեկչության մեջ կասկածվողը ԻՊ-ի կողմնակից էր
Ստոկհոլմում ահաբեկչության իրականացման մեջ կասկածվողը ծայրահեղական կազմակերպությունների, այդ թվում՝ «Իսլամական պետություն» ահաբեկչական խմբավորման կողմնակից էր: ՏԱՍՍ-ի փոխանցմամբ՝ այս մասին հայտնել են Շվեդիայի ոստիկանությունից:
Ստոկհոլմի ոստիկանության ներկայացուցիչ Յան Էվենսոնը հայտնել է, որ Ստոկհոլմի ահաբեկչության գործով ձերբակալվածը ապաստանի մերժում էր ստացել եւ պետք է երկրից արտաքսվեր:
«2014 թվականին նա ապաստան տրամադրելու հայտ է ներկայացրել, 2016-ի հունիսին մերժվել է: Փետրվարի 24-ին նրա նկատմամբ հետախուզում է հայտարարվել արտաքսումից խուսափելու համար»,- նշել է նա:
Ուրբաթ առեւանգված բեռնատարը, որը պատկանում էր Spendrups ընկերությանը, Ստոկհոլմի կենտրոնում մարդկանց վրաերթի է ենթարկել: Ոստիկանության տվյալներով՝ 15 մարդ վիրավորվել է, 4 մարդ զոհվել: Ահաբեկչության գործով միակ ձերբակալվածը ծագումով Ուզբեկստանից 39 տարեկան տղամարդն է, որը, ինչպես հայտնում են լրատվամիջոցները, համակրում է «Իսլամական պետություն» ահաբեկչական խմբավորմանը: Ենթադրվում է, որ նա է եղել բեռնատաի ղեկին: