Մեծ Բրիտանիայի ԱԳ նախարարը Սիրիայում ստեղծված իրավիճակի կապակցությամբ չեղարկել է այցելությունը Մոսկվա

Մեծ Բրիտանիայի ԱԳ նախարար Բորիս Ջոնսոնը չեղարկել ապրիլի 10-ին ծրագրված այցելությունը Մոսկվա՝ Սիրիայում ստեղծված իրավիճակի կապակցությամբ։ Այս մասին ասվում է Մեծ Բրիտանիայի ԱԳՆ հաղորդագրության մեջ։

Հայտարարության մեջ ասվում է, որ Սիրիայում տեղի ունեցած վերջին իրադարձությունները արմատապես փոխել են իրավիճակը։ «Հիմա ինձ համար առաջնայնություն է շարունակել շփումները ԱՄՆ-ի ու այլ երկրների հետ՝ ապրիլի 10-11-ը ծրագրված «յոթյակի» հանդիպման նախօրեին, որպեսզի ապահովենք համակարգված միջազգային աջակցություն հաշտեցման ու քաղաքական գործընթացին։ Ես կփորձեմ կազմակերպել հանդիպում իմ համախոհ գործընկերների հետ, որպեսզի մենք կարողանանք քննարկել հետագա քայլերը»,- նշված է հայտարարության մեջ։

Ջոնսոնի այցելության չեղարկումը մեկնաբանել է Ռուսաստանի ԱԳՆ պաշտոնական ներկայացուցիչ Մարիա Զախարովան։ Նա հիշեցրել է, որ Բրիտանիայի արտգործնախարարի ուղեւորությունը Մոսկվա արդեն մեկ անգամ հետաձգվել է։ «Այնպիսի տպավորություն է, որ մեր արեւմտյան գործընկերներն ապրում են իրենց սեփական իրականության մեջ, որում նրանք սկզբում փորձում են միակողմանի կառուցել հավաքական ծրագրեր, հետո էլ դարձյալ միակողմանի փոխեն դրանք, հորինելով անհեթեթ պատրվակներ»,- ասել է Զախարովան։ Նա հավելել է, որ Ռուսաստանը միշտ կողմ է եղել կայուն հարաբերություններ կառուցելուն՝ ամուր միջազգային իրավական հիմքի վրա, սակայն «կայունությունն ու հետեւողականությունը վաղուց արդեն դադարել են լինել արեւմտյան արտաքին քաղաքականության այցեքարտը»։

Հիշեցնենք, որ ավելի վաղ Ջոնսոնը իր Twitter–ում գրել էր, որ աջակցում է ամերիկյան հրթիռային հարվածը սիրիական ավիաբազայի վրա ու մշտական շփման մեջ է գտնվում պետքարտուղար Ռեքս Թիլերսոնի հետ:

news.am