Բրիտանիայի արտգործնախարարը չեղարկել է այցը Մոսկվա

Մեծ Բրիտանիայի արտգործնախարար Բորիս Ջոնսոնը հայտարարել է, որ չեղյալ է հայտարարում Մոսկվա այցը Սիրիայի իրավիճակի առնչությամբ, հայտնում է «ՌԻԱ Նովոստի»-ն:

«Մեծ Բրիտանիայի արտգործնախարար Բորիս Ջոնսոնը հայտարարություն է հրապարակել ապրիլի 10-ին Մոսկվա նախատեսված այցը չեղյալ հայտարարելու մասին որոշում կայացնելուց հետո»,- ասված է երկրի արտաքին գործերի գերատեսչության հաղորդագրությունում:

«Սիրիայում վերջին իրադարձությունները հիմնարար կերպով փոխել են իրավիճակը: Այժմ ինձ համար առաջնահերթություն է շարունակել ԱՄՆ-ի և այլ երկրների հետ կապերը՝ ապրիլի 10-11-ին նախատեսվող «յոթյակի» հանդիպման նախաշեմին երկրում հրադադարի համակարգված միջազգային աջակցությունը և քաղաքական գործընթացի ինտենսիվացումն ապահովելու համար: Ես կաշխատեմ մեր համախոհ գործընկերների հետ հանդիպման կազմակերպման ուղղությամբ, որպեսզի մենք կարողանանք քննարկել հետագա քայլերը»,- նշված է Ջոնսոնի հայտարարությունում:

Նշվում է, որ Ջոնսոնի այցը Մոսկվա արդեն հետաձգվել էր մեկ անգամ: Նա պատրաստվում էր Ռուսաստան այցելել դեռևս մարտի վերջին, սակայն հետաձգել է այցը ՆԱՏՕ-ի անդամ երկրների արտգործնախարարների հանդիպման ժամանակցույցի փոփոխության պատճառով:

Ավելի վաղ Ջոնսոնը Twitter-ի իր էջում գրել է, որ պաշտպանում է սիրիական ավիաբազայի ուղղությամբ ամերիկյան հրթիռային հարվածը և մշտական կապի մեջ է ԱՄՆ պետքարտուղար Ռեքս Թիլերսոնի հետ:

tert.am