Ուկրաինացիներին թույլ է տրվել առանց վիզայի մուտք գործել Եվրամիության երկրներ
Եվրախորհրդարանի պատգամավորները հավանություն են տվել Կիեւի հետ առանց վիզայի ռեժիմին,– հաղորդում է Daily Express-ը։ Այժմ Ուկրաինայի կենսաչափական անձնագիր ունեցող քաղաքացիները կարող են երեք ամսվա ընթացքում գտնվել ԵՄ–ում, սակայն, ինչպես նշում է պարբերականը, դա նրանց աշխատելու իրավունք չի տալիս։
Ստրասբուրգում, Եվրախորհրդարանի պլենար նիստի ժամանակ, պատգամավորները քվեարկել են Ուկրաինայի քաղաքացիներին առանց վիզայի մուտքի իրավունք տալու համար։ Այժմ Ուկրաինայի անձնագիր ունեցողները կարող են երեք ամիսների ընթացքում ճանապարհորդել Եվրամիության երկրներով։ Որոշումը ուժի մեջ կմտնի հունիսին, այն հավանության է արժանացել 521 կողմ, 75 դեմ եւ 36 ձեռնպահ ձայներով։
Ընդ որում, տվյալ որոշումը ուկրաինացիներին իրավունք չի տալիս ԵՄ–ում աշխատելու՝ առանց հատուկ թույլտվությունների։ Ուկրաինայի բնակչությունը 45 միլիոն է, եւ այսուհետ, բոլոր նրանք, ովքեր ունեն նոր տեսակի կենսաչափական անձնագիր, կարող են օգտվել առանց վիզայի ռեժիմից։
Այս անգամ եվրապատգամավորների որոշումը չի տարածվում Մեծ Բրիտանիայի եւ Իռլանդիայի վրա։
Մինչ այդ ԵՄ–ն մտավախություն ուներ, որ առանց վիզայի ռեժիմը Ուկրաինայի հետ կբերի փախստականների հոսքի, ովքեր ցանկություն կունենան լքել երկիրը՝ նրա արեւելյան հատվածի հետ հակամարտության պատճառով։ Եթե դա իրոք տեղի ունենա, ապա առանց վիզայի ռեժիմը ժամանակավորապես կդադարեցվի։
Առանց վիզայի ռեժիմի հարցերով Եվրախորհրդարանի զեկուցող Մարիա Գաբրիելը հայտարարել է. «Ուկրաինան այժմ համապատասխանում է բոլոր չափանիշներին, այնպես որ վիզաները կարող են չեղարկվել»։ Նրա խոսքերով՝ եվրապատգամավորների որոշումը «ուժեղ ազդանշան է այն մասին, որ Ուկրաինան Եվրամիության առանցքային գործընկերն է «Արեւելյան գործընկերություն» նախագծի շրջանակներում»։