Բելգիայում հրեաները ու մուսուլմանները բողոքում են կենդանիների ծիսական մորթի արգելքի դեմ
Բելգիայում հրեաներն ու մուսուլմանները զայրացած են կենդանիների ծիսական մորթն արգելելու որոշումից, որն 2019-ից ուժի մեջ էմտնելու Ֆլանդրիայում ու Վալոնիայում, հայտնում է RTBF–ը։
«Սա աննախադեպ ճգնաժամ է, ամենասուր ճգնաժամը Երկրորդ համաշխարհային պատերազմի ժամանակներից»,- մեջբերում են լրատվամիջոցները Բելգիայի կենտրոնական հրեական միության նախագահ Ֆիլիպ Մարկեւիչին։ Նա համարում է, որ այս արգելքը քողարկված հարձակում է «բարբարոսներ ներկայացվող» հրեաների ու մուսուլմանների ավանդույթների վրա։
Բրյուսելի մայրաքաղաքային ռեգիոնի խորհրդարանը դեռ չի հստակեցրել իր դիրքորոշումը կրոնական սովորույթների այս տեսակի կիրառման հարցում։
Եվրոպայի հրեական ու մուսուլմանական առաջնորդները Փարիզում 2012-ին տեղի ունեցած համատեղ հանդիպման արդյունքներով հայտնել էին , որ վճռական են տրամադրված հրեաների ու մուսուլմանների կրոնական սովորությունների դեմ հարձակումներին դիմակայելուն, խոսքը մասնավորապես կենդանիների ծիսակարգային մորթի ու թլփատման ավանդույթի մասին է։