Ռուսաստանի բոլոր օդանավակայաններում անվտանգության լրացուցիչ միջոցառումներ են սահմանվել
Ռուսաստանի Դաշնության բոլոր օդանավակայաններում Սանկտ Պետերբուրգի ողբերգական դեպքերից հետո ավիացիոն անվտանգության լրացուցիչ միջոցառումներ են սահմանվել: Այդ մասին հայտարարել է ՌԴ տրանսպորտի փոխնախարար Վալերի Օկուլովը, հայտնում է «ՌԻԱ Նովոստի»-ն:
«Բոլոր օդանավակայաններում սահմանվել են տրանսպորտային անվտանգության ուժեղացված ռեժիմներ, դա վերաբերում է կոնկրետ միջոցառումների՝ սկսած օդանավակայանի շրջակայքով և տերմինալներում հսկողության ռեժիմի ուժեղացումից մինչև լրացուցիչ զննում ու լրացուցիչ տեսահսկման իրականացում»,- հայտնել է Օկուլովը «Ռոսիա- 24» հեռուստաալիքի եթերում:
Տրանսպորտի փոխնախարարը նաև խոստովանել է, որ ցանկացած լրացուցիչ միջոցառում անհարմարություն է պատճառում ուղևորներին, և օդանավակայանները խորհուրդ են տալիս ուղևորներին նախապես ժամանել:
Հիշեցնենք, որ Սանկտ Պետերբուրգի մետրոյի կայարաններից մեկում ապրիլի 3-ին պայթյուն է տեղի ունեցել, որը խլել է 14 մարդու կյանք: Վիրավորների թիվը գերազանցել է 50-ը: Ռուսաստանի Դաշնության քննչական կոմիտեն հայտնել է, որ ահաբեկչությունն իրականացրել է 1995 թվականին ծնված Ակբարժոն Ջալիլովը: