Իսպանիայում ոստիկանությունը ձերբակալել է «վրացական մաֆիայի» 18 անդամների. նրանց թվում նաեւ հայ կա
Իսպանիայում 18 մարդ է ձերբակալվել՝ «վրացական մաֆիայի» դեմ հերթական հատուկ գործողության արդյունքում։ Այս մասին ասվում է El País իսպանական պարբերականում։
Համաձայն պարբերականի տվյալների՝ հատուկ գործողությունն իրականացրել են Կատալոնիայի ինքնավար ոստիկանությունը եւ Իսպանիայի ազգային ոստիկանությունը։ Հանցագործները հիմնականում ծագումով Վրաստանից են կամ ունեն Վրաստանի քաղաքացիություն։
17 ձերբակալվածները մեղադրվում են 47 բնակարանային գողության մեջ։
Ձերբակալվածներից մեկը Հայաստանից եկվոր է։ El País-ը գրում է, որ նա զբաղվել է գողացված իրերի իրացմամբ։
Շրջայցի ընթացքում ոստիկաններն առգրավել են բազմաթիվ ոսկե զարդեր, ձեռքի ժամացույցներ, թանկարժեք կենցաղային տեխնիկա, ինչպես նաեւ մի քանի հազար եվրո՝ կանխիկ։ Ենթադրյալ հանցագործների բնակարաններում գտնվել են նաեւ քիմիական նյութեր, որոնք թույլ են տվել ստուգել ոսկե զարդերի իսկությունը, հարյուրավոր սարքավորումներ՝ անհրաժեշտ բնակարանային գողության համար։
Հանցախմբի դեմ հետաքննությունը սկսվել է 2016-ին։