Մոնակոյի թագավորության տարածքը կընդլայնվի
Մոնակոյի թագավորության մակերեսը կընդլայնվի 6 հեկտարով՝ ծովի ցամաքեցման նոր նախագծի հաշվին,– մամուլի ասուլիսի ժամանակ հայտարարել է Մոնակոյի զբոսաշրջության եւ կոնգրեսների գծով նախագահ Գիյոմ Ռոզը։
«Նախագծի իրականացումը սկսվել է երեք ամիս առաջ։ Ջրի հաշվին վերցված տարածքում կկառուցվեն շքեղ տներ, ինչպես նաեւ այգի, որը կփոխի Մոնտե Կառլոյի տեսքը՝ ծովի կողմից նայելիս։ Շինարարության ավարտը ծրագրված է 2025թվականին»,– պատմել է նա։
Ռոզը ավելացրել է, որ նոր էկո թաղամասի մակերեսը կկազմի 60 հազար քմ.։ Այն կներառի բնակելի տներ եւ գրասենյակներ, ավտոկայանատեղի, ներքին նավահանգիստ, պուրակ եւ ծովափ։ Նոր մակերեսները հնարավորություն կտան մեծացնելու թագավորության գլխավոր մշակութային–ցուցասրահային կենտրոնի՝ «Գրիմալդի–ֆորումի» տարածքը։