Քարդաշյանն իր ոճը կրկնօրինակելու համար 10 մլն դոլարի հայց է ներկայացրել Missguided USA-ի դեմ (լուսանկարներ)

Ամերիկյան Keeping Up With the Kardashians իրապատում շոուի աստղ Քիմ Քարդաշյանը 10 մլն դոլարի դատական հայց է ներկայացրել «արագ նորաձևության» հայտնի բրենդներից մեկի՝ Missguided USA-ի դեմ:

Ինչպես նշում է Daily Mail-ը, 38-ամյա հայուհին Missguided-ին մեղադրել է իր կրած բրենդային հագուստներն արագորեն կրկնօրինակելու ու համացանցում վաճառքի հանելու համար:

Որպես մեղադրանքի ապացույց՝ նա հայցում ներառել է կոլաժներ՝ իր կրած հագուստների ու ընկերության կրկնօրինակների պատկերներով:

Քարդաշյանին դուր չի եկել այն փաստը, որ Missguided-ը հաճախ իր հրապարակումներում թեգ է անում աստղին, նրա լուսանկարն է հրապարակում՝ մարդկանց մոտ թյուր տպավորություն ստեղծելով, թե նա համագործակցում է ընկերության հետ:

Այժմ աստղը դատարանից պահանջում է Missguided-ին ստիպել այլևս չօգտագործել Քարդաշյան անունն ու նրա կերպարը:

Ավելի վաղ հեռուստաաստղն այս թեմայի վերաբերյալ ինստագրամյան գրառում էր արել. «Շատ տհաճ է տեսնել՝ ինչպես են «արագ նորաձևության» բրենդները կրկնօրինակում այն հագուստները, դիզայներական լուծումները, որոնք կյանքի կոչելու համար իրական դիզայներները ջանք ու եռանդ չեն խնայել»:

Նա նշել էր, որ այլևս չի պատրաստվում լռել: