«Քնած գեղեցկուհու» համախտանիշով տառապող աղջիկը օրական 18 ժամ քնում է

19-ամյա Ջեյն Բաթլերը հազվագյուտ նյարդային խանգարման պատճառով, որը միլիոնի դեպքում մեկի մոտ է հանդիպում, զրկված է լիարժեք կյանքով ապրելու հնարավորությունից:

The Daily Mail-ը հաղորդում է, որ աղջիկը տառապում է Կլեյնե-Լեւինի համախտանիշով: Նրան հատուկ են չափից շատ քնկոտության պարբերական դրսեւորումները եւ գիտակցության խանգարումը:

Հիվանդներն օրվա մեծ մասը քնած են, ընդ որում նրանց արթնացնելը շատ դժվար է: Նրանց մոտ նաեւ գիտակցության, կողմնորոշման խախտումներ են նկատվում, ուժերի անկում, ապատիա:

«Քնած գեղեցկուհու» համախտանիշի պատճառով անցյալ տարի Ջեյնը քնած էր մնացել Գոհաբանության եւ Սուրբ Ծննդյան օրը:

Աղջիկը նշում է, որ չնայած անվանը, համախտանիշը հեքիաթի հետ ոչ մի կապ չունի եւ հաճախ ինքը մղձավանջներ է տեսնում: Ընդ որում, ի տարբերություն սովորական մարդկանց, Ջեյնը չի կարող ընդհատել սարսափելի երազը, քանի որ ի վիճակի չէ արթնանալ:

Նման դրվագների ժամանակ, աղջիկը սկսում է աստիճանաբար կորցնել կապն իրականության հետ, տեսողական եւ լսողական տեղեկատվության ընկալման դժվարություններ ունենալ:

Նման խանգարում ունեցող մարդկանց մոտ այդպիսի դրվագները կարող են օրեր, շաբաթներ եւ անգամ ամիսներ տեւել: Ընդ որում շատերը չեն կարողանում ինքնուրույն իրենց մասին հոգ տանել, ի վիճակի չեն դպրոց կամ աշխատանքի գնալ:

Ջեյնը ստիպված է անընդհատ ընդհատել քոլեջում ուսումը: Բացի այդ հիվանդությունը զրկում է նրան պարերին մասնակցելու հնարավորությունից:

Աղջիկը ձգտում է բարձրացնել հասարակության տեղեկացվածությունը Կլեյնե-Լեւինի համախտանիշի մասին: Կարող է տարօրինակ թվալ, բայց երբեմն բժիշկները չեն կարողանում ճիշտ ախտորոշել՝ «Քնած գեղեցկուհու» համախտանիշը շփոթելով երկբեւեռ խանգարման հետ:

«Շատ տխուր է, քանի որ առանց ճիշտ ախտորոշման դու չես կարող անհրաժեշտ օգնություն ստանալ», -նշում է աղջիկը:

Այս թեմայով Ավստրալուհու ամբողջ մարմինը բծերով և կապտուկներով է պատվել AstraZeneca-ով պատվաստվելուց հետո (լուսանկարներ) Քթի հատուկ սփրեյը կարող է վերացնել սոցիալական հեռավորության անհրաժեշտությունը Վաղուց հայտնի հակաբիոտիկը կարող է արդյունավետ հակաքաղցկեղային զենք լինել Ինչու է բարձրանում շաքարն արյան մեջ Սպիտակուցային համեղ ըմպելիքներ, որոնք կօգնեն նիհարել