Վրաստանում ՀՀ դեսպանին պատանդ վերցնելու կոչի համար դատարանի առաջ կկանգնի ազգությամբ ադրբեջանցի Վրաստանի քաղաքացի

Վրաստանում Հայաստանի Հանրապետության դեսպանին պատանդ վերցնելու կոչի համար դատարանի առաջ կկանգնի ազգությամբ ադրբեջանցի Վրաստանի քաղաքացի, հաղորդում է interpressnews.ge–ն:

Գործը վերաբերում է 2016 թվականին Լեռնային Ղարաբաղում տեղի ունեցած «քառօրյա պատերազմի» ժամանակ սոցիալական ցանցերում տեղադրված կոչին: Գործի նյութերի համաձայն՝ ահաբեկչության հանրային կոչի համար մեղադրվող անձը Վրաստանի քաղաքացի է: Չնայած նրան, որ գործին շնորհվել է գաղտնիության դասակարգում, լրատվամիջոցին հայտնի են դարձել որոշ մանրամասներ:

Մասնավորապես, այդ նյութերի համաձայն, 2016 թվականին, երբ Լեռնային Ղարաբաղում բախումներ սկսվեցին, մեղադրյալը Facebook-ում կոչ էր արել Վրաստանում բնակվող ադրբեջանցիներին հավաքվել Հայաստանի դեսպանատան դիմաց: Գործի նյութերի համաձայն՝ հրապարակված ուղերձում մեղադրյալը նաև գրել էր, որ հարկավոր է այրել Հայաստանի դրոշը, ներխուժել Հայաստանի դեսպանատան շենք և պատանդ վերցնել դեսպանին:

Կոչը կյանքի չի կոչվել, սակայն հեղինակի նկատմամբ քրեական հետապնդում է սկսվել մոտ 2 տարի անց: Այդ ժամանակահատվածում քննությունը սպասում էր պաշտոնական պատասխանների, այդ թվում՝ Facebook-ից, որոնք պետք է հաստատեին, որ սոցիալական ցանցում գրառման հեղինակն իսկապես այն մարդն է, ում նկատմամբ նախատեսվում է քրեական հետապնդում սկսել:

Մեղադրանքի պաշտոնական առաջադրումից հետո այդ մարդու նկատմամբ որպես խափանման միջոց է ընտրվել գրավի կիրառումը:

Ավելի վաղ հաղորդվել էր, որ Վրաստանի քաղաքացի հանդիսացող ադրբեջանցի Օրհան Աբասի դեմ քրեական գործ է հարուցվել «ահաբեկչության կոչ» հոդվածով։