Մեծ Բրիտանիայի թագուհին ծաղկեփնջով հանդիպման է գնացել նորածին թագաժառանգի հետ (լուսանկարներ)

Երեկ Մեծ Բրիտանիայի թագուհի Էլիզաբեթ 2-րդը ծանոթացել է իր վեցերորդ ծոռի՝ արքայազն Լուիի հետ:

Հիշեցնենք, որ արքայազն Ուիլյամի ու Քեմբրիջի դքսուհի Քեյթ Միդլթոնի երրորդ երեխան լույս աշխարհ է եկել ապրիլի 23-ին: Նրան անվանել են Լուի Արթուր Չարլզ:

Ինչպես նշում է Daily Mail-ը, 92-ամյա Էլիզաբեթ թագուհին ապրիլի սկզբից բնակվում է Վինձորի ամրոցում: Նա Քենսինգտոնյան պալատ է ժամանել ուղղաթիռով՝ 40 րոպե տևողությամբ թռիչքից հետո: Այնուհետև Range Rover մակնիշի ավտոմեքենա նստելով՝ հասել է պալատի մուտքի մոտ:

Աղբյուրը մանրամասնում է, որ թագուհին իր հետ դաշտային ծաղիկների փունջ է բերել, որը, ենթադրաբար, նվիրել է Քեյթ Միդլթոնին:

Նշվում է, որ Էլիզաբեթը մոտ մեկուկես ժամ է անցկացրել Քենսինգտոնյան պալատում:

Ավանդույթի համաձայն՝ թագուհին առաջինն է իմանում ընտանիքի նոր անդամի ծննդի մասին:

Հիշեցնենք, որ արքայազն Լուի Արթուր Չարլզը բրիտանական գահի ժառանգորդների շարքում 5-րդն է՝ պապից, հորից, ավագ եղբորից ու քրոջից հետո: