Վենսի գլխավոր մարտահրավերը կլինի պահպանել Թրամփի կողմնակիցների աջակցությունը

2028 թվականի նախագահական ընտրություններին ընդառաջ ԱՄՆ փոխնախագահ Ջեյ Դի Վենսը սկսել է ձևավորել իր ինքնուրույն քաղաքական օրակարգը, հաղորդում է Reuters-ը՝ վերլուծելով նրա վերջին հրապարակային ելույթները։

Գործակալության տվյալներով՝ Վենսը փորձում է աստիճանաբար նվազեցնել իր կապը նախագահ Դոնալդ Թրամփի հետ՝ կենտրոնանալով ընտրողների շրջանում առավել պահանջված թեմաների վրա։

Իր ելույթներում Վենսը շեշտը դնում է տնտեսական ազգայնականության, հասարակական անվտանգության և արտաքին քաղաքականության նկատմամբ ավելի զուսպ մոտեցման վրա։ Նրա թիմը կարծում է, որ սրանք այն ոլորտներն են, որոնք, ամենայն հավանականությամբ, կգրավեն ընտրողների աջակցությունը։

Արտաքին քաղաքականության հարցում Վենսը նախկինում դեմ է արտահայտվել Իրանի հետ պատերազմին՝ այն համարելով Հանրապետական կուսակցության ընտրական անհաջողությունների հնարավոր պատճառներից մեկը։ Նա նաև կոչ է արել կուսակցությանը կենտրոնանալ կյանքի թանկացման խնդրի վրա և վերանայել Իսրայելի նկատմամբ իր քաղաքականությունը։

Հանրապետական կուսակցության շրջանակներում Վենսն արդեն դիտարկվում է որպես 2028 թվականի նախագահական ընտրությունների առաջատար թեկնածուներից մեկը։ Սակայն նա դեռ պաշտոնապես չի հայտարարել իր թեկնածությունն առաջադրելու մտադրության մասին։

Վերլուծաբանների կարծիքով՝ Վենսի գլխավոր մարտահրավերը կլինի պահպանել Թրամփի կողմնակիցների աջակցությունը՝ ձևավորելով սեփական քաղաքական կերպարն ու հեռու մնալով գործող նախագահի քաղաքական ժառանգությունից։