Հուշագիր` պատմության և մշակույթի անշարժ հուշարձանների պահպանության մասին

ԿԳՄՍ նախարարության և «Որմնանկար-մոնումենտալ ժառանգություն» հիմնադրամի միջև ստորագրվել է համագործակցության հուշագիր` Հայաստանի Հանրապետության տարածքում գտնվող պատմության և մշակույթի անշարժ հուշարձանների, մասնավորապես՝ որմնանկարների պահպանության նպատակով:

Հուշագիրը ստորագրել են ԿԳՄՍ նախարարի տեղակալ Ալֆրեդ Քոչարյանը և «Որմնանկար-մոնումենտալ ժառանգություն» հիմնադրամի տնօրեն Դավիթ Հովհաննիսյանը:

Կարևորելով որմնանկարների պատմամշակութային ժառանգության արժեքն ու հետագա սերունդներին փոխանցումը, ինչպես նաև դրանց պահպանությունը, օգտագործումը և այդ ուղղությամբ ներդրումային ծրագրերի իրականացումը՝ կողմերը  համատեղ աշխատանքներ կիրականացնեն՝ ՀՀ օրենսդրության շրջանակում:

ՀՀ տարածքում գտնվող պատմության և մշակույթի անշարժ հուշարձանների, մասնավորապես՝ որմնանկարների պահպանության ուղղությամբ ԿԳՄՍ նախարարությունը կտրամադրի պատմության և մշակույթի անշարժ հուշարձան հանդիսացող որմնանկարների առկա ցուցակը, սահմանված կարգով կքննարկի որմնանկարի մաքրման և ամրակայման գիտանախագծային փաստաթղթերը նախարարությանը կից մոնումենտալ հուշարձանների հարցերով աշխատանքային խմբի նիստերում՝ տրամադրելով մասնագիտական եզրակացություն: Նախարարությունը համաձայնեցված գիտանախագծային նախագծերի հիման վրա կտրամադրի որմնանկարի մաքրման և ամրակայման աշխատանքների իրականացման թույլտվություն, ինչպես նաև աշխատանքների կատարման ընթացքում կցուցաբերի մասնագիտական ու իրավական խորհրդատվության աջակցություն:

«Որմնանկար-մոնումենտալ ժառանգության» հիմնադրամը սեփական միջոցների հաշվին կուսումնասիրի և կկազմի Վայոց ձորի մարզի Սերս գյուղի 19-րդ դարի որմնանկարների մաքրման և ամրակայման գիտանախագծային փաստաթղթերը և կներկայացնի նախարարության համաձայնեցմանը, իր միջոցներով կիրականացնի համակարգված ուսումնասիրություն (նկարագրություն, տեխնիկական վիճակ, վտանգվածության աստիճան և այլն) Հայաստանի Հանրապետության տարածքում գտնվող որմնանկարների վերաբերյալ, կփաստագրի ու կկազմի դրանց ճշգրտված ցուցակները՝ ներկայացնելով նախարարությանը:

Նոր որմնանկար հայտնաբերելու դեպքում՝ առաջարկ կներկայացնի նախարարությանը՝ փորձագիտական հանձնաժողովում արժևորման հարցը քննարկելու նպատակով, իր միջոցներով կկազմի որմնանկարի մաքրման և ամրակայման գիտանախագծային փաստաթղթերը՝ ներկայացնելով նախարարության համաձայնեցմանը:

Կազմակերպությունը նախարարությանը կտրամադրի հեղինակային, տեխնիկական հսկողությունների և կապալառու կազմակերպությունների հետ պայմանագրերը՝ նախատեսվող աշխատանքների թույլտվություն ստանալու նպատակով: