Bitcoin-ի գինը կտրուկ նվազել է

Bitcoin-ի և Ethereum-ի գները կտրուկ նվազել են ԱՄՆ-ում սպասվածից բարձր գնաճի տվյալների հրապարակումից հետո։ Ֆինանսական շուկաներում ստեղծված անկայունության պայմաններում շուրջ 1 միլիարդ դոլարի կրիպտոարժութային դիրքեր են լուծարվել՝ հանգեցնելով լծակով առևտուր իրականացնող ներդրողների դիրքերի հարկադիր փակման նոր ալիքի։

Bitcoin-ի գինը նվազել է մինչև 80 հազար դոլար՝ գնաճի տվյալների հրապարակումից առաջ 83 հազար դոլարը գերազանցող մակարդակից նահանջելուց հետո։

Ethereum-ն ավելի մեծ կորուստներ է գրանցել․ դրա գինը 24 ժամվա ընթացքում նվազել է ավելի քան 6 տոկոսով՝ հասնելով շուրջ 2365 դոլարի։

Կրիպտոարժույթների գների անկումը հաջորդել է ԱՄՆ-ում սեպտեմբեր ամսվա սպառողական գների ինդեքսի հրապարակմանը։ Տվյալների համաձայն՝ երկրում տարեկան գնաճը արագացել է՝ հասնելով 3,7 տոկոսի։ Ցուցանիշը գերազանցել է շուկայի կանխատեսած 3,6 տոկոսը, ինչպես նաև օգոստոսին գրանցված 3,4 տոկոսը։

ԱՄՆ Աշխատանքի վիճակագրության բյուրոյի տվյալներով՝ սեպտեմբերին սպառողական գներն ամսական կտրվածքով աճել են 0,6 տոկոսով՝ օգոստոսի 0,4 տոկոսի համեմատ։

Գնաճի արագացմանը զգալիորեն նպաստել է վառելիքի թանկացումը։ Սեպտեմբերին բենզինի գներն աճել են 9,1 տոկոսով, ինչը կազմել է ամսական ընդհանուր գնաճի ավելի քան կեսը։ Էներգակիրների գներն ավելացել են 5,2 տոկոսով, իսկ բենզինի գների տարեկան աճը կազմել է 34,2 տոկոս։

ԱՄՆ-ում գնաճի արագացումը բարդացրել է Դաշնային պահուստային համակարգի դրամավարկային քաղաքականության վերաբերյալ կանխատեսումները։ Շուկայում ուժեղացել են սպասումները, որ մինչև 2026 թվականի ավարտը կարող է քննարկվել տոկոսադրույքների հետագա բարձրացման հարցը։