Աշխարհը հետ է մնում բնության պահպանման նպատակներից 

Աշխարհի երկրները հետ են մնում բնության պահպանության՝ մինչև 2030 թվականը սահմանված նպատակներից։ Ներկայիս տեմպերով հնարավոր չի լինի պահպանության տակ վերցնել մոլորակի ցամաքային և ծովային տարածքների առնվազն 30 տոկոսը, հայտնում է Reuters-ը՝ հղում անելով COP17-ին ընդառաջ հրապարակված գնահատականներին։

2022 թվականին ընդունված Կունմին-Մոնրեալի համաձայնագրով երկրները պարտավորվել էին մինչև 2030 թվականը պահպանության տակ վերցնել ցամաքային և ծովային տարածքների առնվազն 30 տոկոսը։

Սակայն հրապարակված գնահատականների համաձայն՝ ներկայիս պարտավորությունների կատարման դեպքում մինչև 2030 թվականը պահպանության տակ կլինի ցամաքային տարածքների և ներքին ջրերի շուրջ 27 տոկոսը՝ ներկայիս մոտ 20 տոկոսի փոխարեն։

Ծովային տարածքների դեպքում ցուցանիշն ավելի ցածր է։ Ներկայում պահպանության տակ է դրանց շուրջ 10 տոկոսը, իսկ մինչև 2030 թվականը նախատեսվում է ցուցանիշը հասցնել ընդամենը 12 տոկոսի։

Նպատակների իրականացման հիմնական խոչընդոտներից է նաև ֆինանսավորման պակասը։ Միաժամանակ, աշխարհում շարունակում են մեծ գումարներ ուղղվել բնությանը վնասող տնտեսական գործունեության խրախուսմանը։

Այս և կենսաբազմազանության պահպանությանն առնչվող այլ հարցեր կքննարկվեն հոկտեմբերի 19–30-ը Երևանում անցկացվելիք ՄԱԿ-ի Կենսաբազմազանության մասին կոնվենցիայի կողմերի 17-րդ համաժողովում՝ COP17-ում։

Համաժողովի ընթացքում առաջին անգամ կամփոփվի Կունմին-Մոնրեալի գլոբալ շրջանակի իրականացման առաջընթացը։ Մասնակից երկրները կգնահատեն ստանձնած պարտավորությունների կատարման ընթացքը և կքննարկեն մինչև 2030 թվականը սահմանված 23 նպատակներին հասնելու հետագա քայլերը։

Top News