Ինձ համար գլխավորն այն է, որ թիմը խաղա այնպես, ինչպես մենք ենք ուզում

ՈւԵՖԱ Եվրոպա լիգայի խաղարկության լիգայի փուլի 2-րդ տուրի «Յագելոնիա» – «Արարատ-Արմենիա» հանդիպմանն ընդառաջ կայացել է երևանյան ակումբի գլխավոր մարզիչ Մանուել Տուլիպայի նախախաղային մամուլի ասուլիսը։

Պորտուգալացի մասնագետը պատասխանել է լրագրողների հարցերին՝ անդրադառնալով մրցակցի խաղաոճին, կադրային խնդիրներին և թիմի պատրաստվածությանը։

- «Յագելոնիան» նախորդ երեք հանդիպումներում պարտություն է կրել։ Արդյո՞ք այդ վիճակագրությունը «Արարատ-Արմենիային» դարձնում է առաջիկա դիմակայության ֆավորիտ։

- Այլ հանդիպումներում գրանցված պարտությունները կամ արդյունքները չեն կարող որևէ թիմի ֆավորիտ դարձնել մեկ ուրիշ խաղում։ Ուսումնասիրել եմ «Յագելոնիայի» ելույթները և կարող եմ ասել, որ նույնիսկ պարտված հանդիպումներում նրանք շատ մրցունակ են եղել ու լավ ֆուտբոլ են ցուցադրել։ Ընդհանուր առմամբ, մրցակիցը շատ լավ թիմ է, ունի հստակ խաղային ձեռագիր և որակյալ ֆուտբոլիստներ։ Ֆավորիտ դառնում են բուն հանդիպման ընթացքում՝ խաղադաշտում կայացրած ճիշտ որոշումների շնորհիվ։ Այս անկանխատեսելի մրցավեճում շատ կարևոր են լինելու մանրուքները՝ ստանդարտ դիրքերը, երկրորդ գնդակների համար պայքարն ու հակագրոհները, ինչպես եղավ «Սպարտայի» դեմ մեր առաջին խաղում։

- Ի՞նչ վիճակում են գտնվում վնասվածք ունեցող Էդգար Գրիգորյանն ու Բուենոն, և արդյո՞ք նրանք պատրաստ են խաղին։

- Բուենոն պատրաստ չէ առաջիկա հանդիպմանը. նա վնասվածք է ստացել հավաքականի ճամբարում և շարքից դուրս է մնացել մոտ երկու շաբաթով: Նա պարզապես թիմի հետ է, որպեսզի շարունակի մնալ բժշկական շտաբի վերահսկողության տակ։ Իսկ Էդգար Գրիգորյանն արդեն ապաքինվել է, և մեծ է հավանականությունը, որ նա պատրաստ կլինի խաղին։

- Երևանյան պարտությունից հետո ի՞նչ հոգեբանությամբ ու տրամադրվածությամբ եք ժամանել Լեհաստան, և ի՞նչ դասեր եք քաղել առաջին տուրի հանդիպումից:

- Այո՛, սա թիմի համար նոր փորձառություն է, բայց «Արարատ-Արմենիան» Եվրոպայում այնքան էլ նորեկ չէ, որքան կարող է թվալ. վերջին ինը տարիների ընթացքում ակումբը եվրագավաթային 35 հանդիպում է անցկացրել և տոնել 14 հաղթանակ: Այս առումով մենք որոշակի փորձ ունենք, թեև նման բարձր մակարդակում մրցելը նոր մարտահրավեր է։ Առաջին խաղից հետո մենք, բնականաբար, դասեր քաղել ենք՝ հատկապես մանրուքների մասով:

Գտնում եմ, որ «Սպարտայի» դեմ շատ լավ խաղ ենք անցկացրել, պարզապես թերացել ենք առանձին դետալներում՝ պրեսինգ, առաջին և երկրորդ գնդակներ, օդային պայքար, ստանդարտներ։ Աշխատել ենք այդ ամենը շտկելու ուղղությամբ և հուսով եմ, որ առաջիկա խաղում այդ բացթողումներն արդեն ուղղված կլինեն։

Եվրոպա լիգան շատ ուժեղ մրցաշար է, իսկ մեր մրցակիցը՝ շատ լավ թիմ: Այն, որ նրանք երեք խաղ անընդմեջ պարտվել են, ինձ համար ոչնչի մասին չի խոսում։ Նախորդ մրցաշրջաններում ևս «Յագելոնիան» շատ մրցունակ է եղել, և չնայած մի քանի բարձրակարգ ֆուտբոլիստների հեռանալուն, սա երկարաժամկետ նախագիծ ունեցող ակումբ է։ Վաղը մեզ լուրջ փորձություն է սպասվում, և կարծում եմ՝ թիմը հոգեբանորեն պատրաստ է։

- Նախորդ վեց եվրագավաթային խաղերում Զիդան Բանջաքին ընդգրկվել է մեկնարկային կազմում, սակայն գոլային գործողությամբ աչքի չի ընկել։ Արդյո՞ք նա ցուցադրում է իր ողջ ներուժը, և արդյո՞ք այդ փաստը մտահոգում է Ձեզ:

- Մենք այնպես ենք անում, որ բոլորը խաղալու հնարավորություն ստանան, և այս ամբողջ ընթացքում բոլորն էլ կարևոր դեր են ունեցել: Օրինակ՝ Շաղոյանը շատ կարևոր էր մեկնարկային խաղերում, իսկ Զիդանը շատ կարևոր գոլ խփեց «Ցելյեի» դեմ հանդիպմանը։ Այո՛, հարցադրումը տեղին է, որովհետև ես իսկապես կցանկանայի, որ Բանջաքին ավելի արդյունավետ լիներ, բայց մյուս կողմից՝ եզրային հարձակվողներն ունեն նաև շատ այլ առաջադրանքներ: Նրանք պետք է լինեն ստեղծագործ և տարածություններ բացեն թիմակիցների համար։ Այս առումով ես շատ գոհ եմ Զիդանի աշխատանքից. նա լավ է համագործակցում խաղընկերների հետ, ազատ գոտիներ է ստեղծում և խաղադաշտի եզրափակիչ 30 մետրի հատվածում լուրջ խնդիրներ է առաջացնում մրցակիցների համար։ Ընդհանուր առմամբ, գոհ եմ մեր բոլոր եզրային հարձակվողներից՝ թե՛ Բանջաքիից, թե՛ Շաղոյանից, թե՛ Արթուր Սերոբյանից, և թե՛ Ֆրանսիսից։

- Արդյո՞ք «Յագելոնիան» և «Արարատ-Արմենիան» նմանություններ ունեն իրենց խաղաոճով, մարտավարական մոտեցմամբ ու փիլիսոփայությամբ։

- Կարող եմ ասել, որ նմանություններ կան. երկու թիմերն էլ գործում են նույն մարտավարական սխեմայով (4-2-3-1), ինչպես նաև նման են պաշտպանվելու, պաշտպանությունից հարձակման անցնելու և գնդակը խաղարկելու սկզբունքներով։ Սակայն կան նաև զգալի տարբերություններ՝ հատկապես ֆիզիկական տեսանկյունից, քանի որ մեր առաջնությունները տարբեր են։

Այստեղ առաջնությունը շատ ավելի ինտենսիվ է, պայքարն ավելի շատ է. ունենալով Գդանսկում ապրելու և աշխատելու փորձ՝ ես լավ գիտեմ տեղի մթնոլորտն ու ֆուտբոլի առանձնահատկությունները։ Գուցե ֆիզիկական առումով իրավիճակներն այլ են, բայց ընդհանուր խաղաոճով երկու թիմերն ավելի շատ նման են միմյանց, քան տարբեր։

- Երևանի համեմատ եղանակային պայմաններն այստեղ կտրուկ փոխվել են՝ ցուրտ է և խոնավ։ Որքանո՞վ դա կարող է խանգարել թիմին վաղվա խաղում։

- Հարցը շատ հետաքրքիր է այն տեսանկյունից, որ իսկապես կարող են որոշակի բարդություններ առաջանալ։ Հնարավոր անձրևի հետևանքով խոտածածկն ու գնդակը կարող են ավելի թաց լինել, ինչի պատճառով գնդակի խաղարկման մեր պատկերացրած ռիթմը կարող է խախտվել, իսկ փոխանցումներ կատարելիս կմեծանա ռիսկի գործոնը։ Սակայն երկու թիմերի ֆուտբոլիստներն էլ ունեն հստակ խնդիր՝ պահպանել սեփական խաղաոճն ու խաղային ինքնությունը։ Եվրագավաթային տարբեր փուլերում, տարբեր երկրներում ու եղանակային պայմաններում մենք կարողացել ենք պահպանել մեր ձեռագիրը, և հենց դա է մեզ հասցրել այստեղ։ «Յագելոնիան» ևս սովորաբար հավատարիմ է մնում իր խաղաոճին, իսկ երբ ունես հստակ ձեռագիր, կողմնակի պայմանները մեծ հաշվով չեն խանգարում։ Ես ևս մեկ անգամ կոչ եմ անում մեր ֆուտբոլիստներին հավատարիմ մնալ մեր խաղաոճին։ Այո՛, մանրուքները կարող են որոշիչ լինել, ինչ-որ պահի ֆուտբոլիստը կարող է սխալ փոխանցում կատարել, բայց ինձ համար գլխավորն այն է, որ թիմը խաղա այնպես, ինչպես մենք ենք ուզում։

Հանդիպումը կկայանա այսօր՝ հոկտեմբերի 15-ին, Երևանի ժամանակով 23։00-ին։

armsport.am