Նոր ուսումնական տարին հայտարարվել է Ընթերցանության տարի․ Ժաննա Անդրեասյանի ուղերձը սովորողներին (տեսանյութ)

Նոր ուսումնական տարին հայտարարվել է Ընթերցանության տարի: Տարվա ընթացքում նախատեսված են սովորողների ընթերցանության խրախուսմանն ուղղված մի շարք միջոցառումներ: 
 
ԿԳՄՍ նախարար Ժաննա Անդրեասյանի շնորհավորական ուղերձ է հղել Գիտելիքի և դպրության օրվա կապակցությամբ՝ Վարդգես Պետրոսյանի անվան Գեղարքունիքի մարզային գրադարանից: 
 
«Սիրելի՛ սովորողներ, կրթական ոլորտի սիրելի՛ աշխատակիցներ, մենք մեկնարկում ենք նոր ուսումնական տարին, որն այս տարի անվանել ենք ընթերցանության տարի, քանի որ ընթերցանությունը մեր երեխաների որակյալ կրթության ամենակարևոր բաղադրիչներից մեկն է, որը պետք է խրախուսենք ամենատարբեր ձևերով, և այդ ձևերից մեկը գրադարան այցելելն է։
 
Մենք այսօր Գավառի մարզային գրադարանում ենք, որտեղ, բացի գրքեր կարդալուց, դուք կարող եք ծանոթանալ նաև հնատիպ գրականությանը և մեր տպագրության պատմությանը։ Կարող եք նաև շատ հետաքրքիր հուշանվերներ ձեռք բերել, որոնք ձեզ ոչ միայն կհիշեցնեն գրադարանի մասին, այլ նաև կդառնան ամենօրյա ընթերցանության համար շատ օգտակար գործիք։ Այնուհետև ընթերցանությունը կարող եք շարունակել բակում՝ մեկ բաժակ սուրճի շուրջ, և այս փորձառությունը կարող եք վայելել ինչպես Գավառի գրադարանում, այնպես էլ մեր մարզերի և Երևանի գրադարաններում։ Հուսով եմ, որ ընթերցանության տարին կլինի շատ կարդալու և կարդալու նոր միջավայրեր բացահայտելու տարի։
 
Շնորհավո՛ր սեպտեմբերի 1-ը»,-իր ուղերձում նշել է նախարարը։