Գլխուղեղի վիրահատություն արհեստական բանականության կիրառմամբ

Մեծ Բրիտանիայի բնակիչը դարձել է աշխարհում առաջին պացիենտը, որի գլխուղեղի ուռուցքը հեռացվել է՝ կիրառելով արհեստական բանականություն (ԱԲ)։ Sky News-ի հաղորդմամբ՝ վիրահատությունն իրականացրել են Լոնդոնի Համալսարանական քոլեջի NHS Foundation Trust-ի կազմում գործող Նյարդաբանության և նյարդավիրաբուժության ազգային հիվանդանոցի վիրաբույժները։

Պացիենտը 48-ամյա Ռիս Հիբբերտն է։ Հիբբերտի խոսքով՝ վիրահատությունը փրկել է իր տեսողությունը, և նա արդեն վերադարձել է աշխատանքի։ Վիրահատության ընթացքում արհեստական բանականությունն իրական ժամանակում օգնել է հայտնաբերել գլխուղեղի ամենափոքր անատոմիական կառուցվածքները։

Համակարգը գունային նշագրում է տվել կարևոր հատվածներին՝ օգնելով վիրաբույժներին խուսափել դրանց վնասումից ուռուցքի հեռացման ժամանակ։ Բժիշկների խոսքով՝ գլխուղեղի բազմաթիվ կենսական նշանակության հատվածներ, այդ թվում՝ տեսողության համար պատասխանատու նյարդերը, գտնվում են ուռուցքի անմիջական հարևանությամբ, ուստի նույնիսկ մեկ միլիմետր սխալը կարող էր հանգեցնել լուրջ և անդառնալի հետևանքների։ Արհեստական բանականության կիրառումը թույլ է տվել բարձրացնել վիրահատության ճշգրտությունն ու նվազեցնել բարդությունների վտանգը։