Էապես կրճատվել է այն բնակավայրերի թիվը, որտեղ չկան և հասանելի չեն նախադպրոցական ծառայություններ

Վերջին երեք տարիներին Հայաստանում զգալիորեն կրճատվել է այն բնակավայրերի թիվը, որտեղ հասանելի չեն նախադպրոցական ծառայությունները։ ՀՀ ԱԺ մարդու իրավունքների պաշտպանության և հանրային հարցերի մշտական հանձնաժողովի նիստում ԿԳՄՍ նախարար Ժաննա Անդրեասյանն ընդգծեց, որ իրականացված աշխատանքի արդյունքում գրանցվել է էական առաջընթաց։

«Մեր աշխատանքի արդյունքում էապես կրճատվել է այն բնակավայրերի թիվը, որտեղ չկան և հասանելի չեն նախադպրոցական ծառայություններ։ Այս պահին մեր 1011 բնակավայրերից միայն 87-ում նախադպրոցական ծառայություն հասանելի չեն կամ 8,6 տոկոսում։ Ընդամենը 3 տարի առաջ այդ ցուցանիշը 229 կամ 22,7 տոկոս էր»,- ասաց Ժաննա Անդրեասյանը։ Նախարարի խոսքով՝ Կառավարության կողմից իրականացվող «500 մանկապարտեզների» ծրագիրը միտված է հատկապես այն համայնքներին, որտեղ նախկինում առկա էին հասանելիության խնդիրներ։