«Երեխաները պետք է գնան նոր դպրոց նոր ճանապարհներով». Նորակառույց դպրոցներ տանող ճանապարհները կհիմնանորոգվեն

ՀՀ կառավարությունն իր այսօրվա՝ մարտի 5–ի նիստում վերաբաշխում կատարեց 2026–ի պետական բյուջեի մասին օրենքում, որով նախատեսվում է 339 մլն դրամ հատկացնել մարզպետների աշխատակազմերին՝ դեպի կլաստերային դպրոցներ տանող ընդհանուր 7.4 կմ երկարությամբ ճանապարհահատվածների հիմնանորոգման նախագծանախահաշվային փաստաթղթերի ձեռքբերման, դրանց փորձաքննության ծառայությունների, ինչպես նաև 1.4 կմ ընդհանուր երկարությամբ ճանապարհահատվածի հիմնանորոգման համար։

Վարչապետ Նիկոլ Փաշինյանը պարզաբանեց, որ հարցը վերաբերում է նորակառույց դպրոցներ տանող ճանապարհների հիմնանորոգմանը։ «Խոսքը 300 դպրոց ծրագրի շրջանակներում կառուցվող դպրոցների մասին է։ Հիշո՞ւմ եք, որ մենք խոսել ենք, որ երեխաները պետք է գնան նոր դպրոց նոր ճանապարհներով, և, իհարկե, տրանսպորտային հարցի լուծման մեր նախնական պատկերացումն ունեինք մենք, բայց նաև հետագայում ծնողների հետ հաղորդակցության ընթացքում որոշակի նոր գաղափարներ են ի հայտ եկել, դա էլ կփորձարկենք»։