800-ամյա Շնադից դղյակը վաճառքի է հանվել ընդամենը 1 եվրոյով

Գերմանիայի Բադ Դյուբեն քաղաքում 800-ամյա Շնադից դղյակը վաճառքի է հանվել ընդամենը 1 եվրոյով։ Քաղաքը նոր սեփականատեր է փնտրում պատմական շինությունը փրկելու համար։ Դղյակը զբաղեցնում է շուրջ 1012 քառակուսի մետր տարածք, ունի ասպետների սրահ և երկու աշտարակ։ Այն ժամանակին ծառայել է որպես բնակելի շենք, համայնքապետարան, փոստային բաժանմունք և մանկապարտեզ։

2014 թվականին դղյակը հյուրանոցի և ռեստորանի վերածելու ծրագիր էր ներկայացվել, սակայն այն ձախողվել է։ Նախատեսված ներդրումների փոխարեն իրականացվել է ընդամենը 400 հազար եվրոյի աշխատանք, իսկ գործարքը հետագայում չեղարկվել է։

Թեև դղյակի վաճառքի գինը խորհրդանշական է՝ 1 եվրո, դրա վերանորոգման համար անհրաժեշտ կլինի շուրջ 20 միլիոն եվրո։ Բացի այդ, աշխատանքները պետք է իրականացվեն պատմական հուշարձանների պահպանության պահանջներին համապատասխան։