Մեծ Բրիտանիայում առաջին երեխան է ծնվել մահացած դոնորից արգանդի փոխպատվաստում ստացած կնոջից

Մեծ Բրիտանիայում առաջին երեխան է ծնվել մահացած դոնորից արգանդի փոխպատվաստում ստացած կնոջից: Լոնդոնից և Օքսֆորդից վիրաբույժները, որոնք մասնակցել են փոխպատվաստմանը և հետևել մորը հղիության և ծննդաբերության ընթացքում, երեխայի ծնունդն անվանել են «բեկումնային պահ», որը կարող է հույս տալ անբարենպաստ ախտորոշում ունեցող բազմաթիվ կանանց:

Փոքրիկ Հյուգոն այժմ 10 շաբաթական է: Նա ծնվել է 2025 թվականի Սուրբ Ծննդից կարճ ժամանակ առաջ՝ Լոնդոնի արևմտյան մասում գտնվող Queen Charlotte's and Chelsea Hospital հիվանդանոցում: Ծնվելու պահին նա կշռել է մոտ 3,2 կգ: Հյուգոյի ծնողները՝ Գրեյս Բելը և Սթիվ Փաուելը, իրենց որդու ծնունդն իսկական հրաշք են անվանում: Նրանք ասում են, որ դոնորի ընտանիքը անհավանական «բարություն և անձնուրացություն» է ցուցաբերել և իրենց «անհավանական նվեր» է մատուցել՝ թույլատրելով փոխպատվաստումը, հաղորդում է BBC-ն:

Դա Մեծ Բրիտանիայում առաջին դեպքը չէ, երբ կինը երեխա է ծննդաբերում ուրիշի արգանդով: 2025 թվականի սկզբին ծնվել է Էմի անունով մի աղջիկ, սակայն այդ ժամանակ դա ողջ-առողջ դոնորից արգանդի փոխպատվաստումից հետո առաջին ծնունդն էր։

Հյուգոյի մայրը՝ Գրեյսը, այժմ 30 տարեկան է։ Նա ծնվել է առանց արգանդի և երբեք դաշտան չի ունեցել, սակայն ունի նորմալ գործող ձվարաններ. հիվանդություն, որը կոչվում է Մայեր-Ռոկիտանսկի-Կյուստեր-Հաուզերի համախտանիշ (MRKH), որը Մեծ Բրիտանիայում հանդիպում է մոտավորապես 5000 կանանցից մեկի մոտ։ 16 տարեկանում նրան հայտնել են, որ նա չի կարողանա իր սեփական երեխային կրել։

Ծնող դառնալու համար զույգն ուներ միայն երկու տարբերակ՝ ապավինել արգանդի փոխպատվաստմանը կամ դիմել փոխնակ մոր օգնությանը։ Գրեյսը հիշում է, որ երբ զանգ ստացավ, որ արգանդ է հայտնաբերվել և փոխպատվաստումը հնարավոր է, նա «իսկական շոկի մեջ էր»։ Սակայն միևնույն ժամանակ նա հստակ հասկանում էր, թե ինչ «անհավանական նվեր» էր իրեն պարգևում դոնորի ընտանիքը՝ իրեն հնարավորություն տալով ինքնուրույն երեխա կրել և ծննդաբերել։

«Ես ամեն օր մտածում եմ իմ դոնորի և նրա ընտանիքի մասին և աղոթում եմ, որ նրանք մխիթարություն գտնեն այն փաստի մեջ, որ իրենց դուստրն ինձ ամենամեծ նվերը պարգևեց՝ կյանքի նվերը,- ասում է Գրեյսը: -Նրա մի մասնիկը հավերժ կապրի»։ Դոնորի անունը և մահվան պատճառը չեն հրապարակվել։

Գրեյսի արգանդի փոխպատվաստման վիրահատությունը տեղի է ունեցել Օքսֆորդի Churchill Hospital հիվանդանոցում 2024 թվականի հունիսին և տևել է 10 ժամ: Մի քանի ամիս անց զույգը ենթարկվել է արտամարմնային բեղմնավորման, որին հաջորդել է սաղմի փոխպատվաստումը Լոնդոնի Lister Fertility կլինիկայում։

«Դա հրաշք էր: Հիշում եմ՝ ինչպես արթնացա այդ առավոտյան, տեսա նրա փոքրիկ դեմքը՝ ծծակը բերանում, և զգացի, որ պետք է արթնանամ: Դա պարզապես անհավանական էր»,- հիշում է Գրեյսը որդու ծնվելուց հետո իր առաջին զգացողությունների մասին: