Առողջության ապահովագրության բազային փաթեթին՝ հավելյալ փաթեթների հնարավորություն

Առողջության համընդհանուր ապահովագրության հիմնադրամի և 4 ապահովագրական ընկերության միջև ստորագրվեց համագործակցության հուշագիր. նպատակն է տեղեկատվության փոխանակման, ակտիվ համագործակցության արդյունքում քաղաքացիներին առաջարկել պետական բազային փաթեթին լրացնող փաթեթներ՝ մասնավոր ապահովագրականների կողմից: «Արմենպրես»-ի փոխանցմամբ՝ հուշագրի ստորագրմանը ներկա էր ՀՀ առողջապահության նախարար Անահիտ Ավանեսյանը: Հուշագիր կնքվեց Առողջության համընդհանուր ապահովագրության հիմնադրամի և «Ինգո Արմենիա», «ԷՖԵՍ», «Լիգա Ինշուրանս», «Սիլ Ինշուրանս» ապահովագրական ընկերությունների միջև:

Հուշագրի շրջանակում կողմերը կհամագործակցեն առողջության համընդհանուր ապահովագրության համակարգի զարգացման և առողջապահական ծառայությունների որակի բարձրացման ուղղությամբ՝ պարբերաբար փոխանակվելով տեղեկատվությամբ և քննարկելով ընդհանուր հետաքրքրություն ներկայացնող հարցեր:

«Ըստ էության, ամբողջացնում ենք մեր առողջապահության համակարգում ապահովագրական սիստեմը: Մեր նպատակն էր, որ պետությունն իր բոլոր քաղաքացիների համար ապահովի բազային փաթեթը, որը լուծում է մարդկանց առողջական հիմնարար խնդիրները: Բայց մենք նաև ակնկալում ենք, որ մասնավոր ապահովագրական ընկերություններն էլ բազային փաթեթին հավելյալ պետք է ունենան առաջարկներ, +ծառայություններ, ավելի հարմարավետ հնարավորություններ: Այս հուշագրով ամբողջացնում ենք այս համակարգը»,-ասաց նախարար Անահիտ Ավանեսյանը:

Ավանեսյանը նկատել է՝ գործատուներն էլ սպասում են հավելյալ փաթեթների մշակմանը, որովհետև ուզում են շարունակել մասնավոր ապահովագրական ընկերությունների հետ աշխատել ու իրենց աշխատակիցներին ավելի մեծ երաշխիքներ տալ: «Մենք ակնկալում էինք, որ պետական ապահովագրական համակարգի ներդրումը ոչ թե խաթարելու է շուկան, այլ հակառակը՝ նոր հնարավորություններ է ընձեռելու՝ մարդկանց էլ ավելի մեծ փաթեթներից օգտվելու: Մենք ոչ թե իրար հետ ենք մրցում, այլ հակառակը՝ ստեղծում ենք մի ամբողջական դաշտ, որտեղ մասնավոր ապահովագրական ընկերություններն իրար հետ մրցելով, լավագույն հավելյալ փաթեթներ առաջարկելով քաղաքացիներին՝ կարողանալու են հեշտ աշխատել նաև պետական ապահովագրական հիմնադրամի հետ: Ուզում ենք միասին, հասկանալի փոխգործակցության շրջանակում ունենալ քաղաքացիների համար ավելի հարմարավետ բազային փաթեթ+ մասնավոր փաթեթի տրամաբանությունը»,-ընդգծեց նախարարը:

Նրա խոսքով՝ հավելյալ փաթեթներում կլինեն պետական փաթեթի շրջանակում հասանելի ծառայությունների ավելի մեծ քանակներ ու ծառայությունների նոր շրջանակներ: Նա հիշեցրեց՝ բազային փաթեթներում դրված են սահմանաչափեր, օրինակ՝ նեղ մասնագետի խորհրդատվության սահմանաչափ կա: Ավանեսյանն ակնկալում է, որ հետագայում գործակցությունն էլ ավելի կզարգացնեն: Հաջորդիվ, եթե անձը ունենա թե բազային, թե մասնավոր ապահովագրական փաթեթ, գուցե հանդես գան միասնական ձևաչափով, որ քաղաքացին առնչություն չունենա մի քանիսի՝ պետականի և մասնավոր ապահովագրականների հետ:

«Այս համագործակցության հուշագիրը ուղենշում է մեր հետագա համագործակցությունների տարբեր շրջանակներ՝ և տվյալների փոխանակման, և մեր քաղաքացիներին լրացուցիչ փաթեթների  տրամադրման առումով, որը հնարավորություն կտա ձևավորել առավել ամբողջական, անհատականացված ծառայությունների շրջանակ՝ ապահովագրական ընկերությունների փաթեթների մասնակցությամբ»,-ասաց Առողջության համընդհանուր ապահովագրության հիմնադրամի գլխավոր տնօրենի ժամանակավոր պաշտոնակատար Սամվել Խարազյանը: Նա հավելեց՝ հնարավորություն կունենան փոխանակվել տեղեկատվությամբ, նաև միմյանց տեղեկացնել փաթեթներում հնարավոր փոփոխությունների վերաբերյալ, որ մասնավոր ապահովագրական ընկերությունները լրացուցիչ փաթեթներ կազմելիս հաշվի առնեն փոփոխություններն ու կարողանան ավելի հարմարեցված ծառայություններ տրամադրել քաղաքացիներին: