ԵՄ եւս մեկ երկիր օրինագիծ է պատրաստում երեխաների` սոցցանցերի հասանելիությունն արգելելու մասին

Սլովենիայի փոխվարչապետ Մատեյ Արկոնը հայտնել է, որ երկիրը պատրաստում է օրինագիծ 15 տարեկանից փոքր երեխաների համար սոցցանցերի հասանելիությունն արգելելու մասին, տեղեկացրել է Reuters-ը։ Արկոնի խոսքով՝ կրթության նախարարությունը նախաձեռնել է այս հնարավորությունը՝ հիմնվելով այլ երկրների փորձի վրա։ Նա ավելացրել է, որ կրթության եւ թվային տեխնոլոգիաների ոլորտի փորձագետները եւս կմասնակցեն օրենքի մշակմանը՝ ուղղված երեխաների եւ դեռահասների պաշտպանությանը։

Ինչպես գրել է Reuters-ը, Սլովենիան, որը մոտ 2 մլն բնակչություն ունի, հետեւում է Իսպանիայի եւ Հունաստանի օրինակին, որոնք մինչ այդ այս շաբաթ առաջարկել էին արգելել սոցցանցերի օգտագործումը դեռահասների համար։ Մասնավորապես, կառավարության բարձրաստիճան աղբյուրի խոսքով՝ Իսպանիան ցանկանում է արգելել սոցցանցերը 16 տարեկանից փոքր երեխաների համար, իսկ Հունաստանը պատրաստվում է նման արգելք հայտարարել 15 տարեկանից փոքրերի համար։

Այլ երկրներ, ինչպիսին են Մեծ Բրիտանիան եւ Ֆրանսիան, նույնպես դիտարկում են միջոցների խստացման հնարավորությունը սոցցանցերի հանդեպ։