Սեղանի խաղերը մտերմացնում են ընտանիքներին տոների ժամանակ. Conversation

Սեղանի համատեղ խաղերը ամանորյա եւ սուրբծննդյան տոներին օգնում են ամրապնդել ընտանեկան կապերը, նվազեցնել սթրեսը եւ բարելավել սերունդների միջեւ փոխըմբռնումը, պատմել է գիտնականների միջազգային թիմը։ Այս մասին տեղեկացրել է The Conversation պորտալը։

Սակայն հոգեբաններն ընդգծել են, որ խաղի ընտրությունը նշանակություն ունի։ Սեղանի տարբեր խաղերն ակտիվացնում են փոխգործակցության տարբեր կողմերը՝ հաղորդակցայինից մինչեւ հուզական ինքնակարգավորում։

Իրենց հերթին, պատահականության տարրեր ունեցող քարտային խաղերը հաճախ առաջացնում են ուժեղ հուզական ռեակցիաներ: Հոգեբանները սա վերագրում են կորստի էֆեկտին. մարդիկ ավելի ուժեղ են արձագանքում պարտություններին, քան հաղթանակներին, նույնիսկ եթե հասկանում են, որ արդյունքը կախված է բախտից: Նման խաղերը հստակ ցույց են տալիս, թե ինչպես են ընտանիքի տարբեր անդամները հաղթահարում հիասթափությունն ու սթրեսը:

Սեղանի կոոպերատիվ խաղերը, որտեղ մասնակիցները խաղում են ոչ թե միմյանց, այլ ընդհանուր «համակարգի» դեմ, ուժեղացնում են կոլեկտիվ արդյունավետության զգացումը՝ այն համոզմունքը, որ խումբը կարող է ավելին անել, քան ցանկացած անհատ: ​​Դրանք նաեւ ցույց են տալիս բաշխված մտածողության սկզբունքները, որոնց դեպքում խնդիրների լուծումը բխում է բոլոր մասնակիցների գիտելիքների եւ հմտությունների համախմբումից:

Խաղերը, որոնք արգելում են բանավոր հաղորդակցությունը, հատկապես հետաքրքիր են հոգեբանների համար: Դրանք ընդգծում են ոչ բանավոր սինքրոնացման դերը՝ անգիտակցաբար միմյանց ռիթմը եւ ժամանակացույցը համապատասխանեցնելու մարդկանց ունակությունը, նույնիսկ լիակատար լռության մեջ:

Մասնագետները նշել են, որ խաղն ինքնին պակաս կարեւոր է, քան հաղորդակցության համար ստեղծված տարածքը: Տոների ժամանակ, երբ հուզական սպասումները հատկապես բարձր են, միասին խաղալը կարող է անվտանգ միջոց լինել կապերը վերականգնելու, լարվածությունը նվազեցնելու եւ միմյանց նորովի տեսնելու համար։