Մարզային դպրոցների տարրական դասարանների երեխաներն օգտվում են «Դպրոցական տաք սնունդ» ծրագրից
ԿԶՆԱԿ հիմնադրամի «Դպրոցական սնունդ և երեխաների բարեկեցություն» հիմնարկի նախաձեռնությամբ նոյեմբեր–դեկտեմբեր ամիսներին ՀՀ մի շարք մարզերում և Երևանում իրականացվել է մասնագիտական աշխատաժողովների շարք՝ ուղղված «Առողջ ապրելակերպ» առարկայի «Սնուցում և ֆիզիկական ակտիվություն» բաղադրիչի դասավանդման արդյունավետության բարձրացմանը։
Եզրափակիչ աշխատաժողովը տեղի է ունեցել Երևանի Մխիթար Հերացու անվան պետական բժշկական համալսարանի «Հերացի» ավագ դպրոցում:
Ողջույնի խոսքով հանդես են եկել ԿԳՄՍ նախարարի տեղակալ Արաքսիա Սվաջյանը, ՄԱԿ-ի Պարենի համաշխարհային ծրագրի հայաստանյան գրասենյակի փոխտնօրեն Օսկար Էքդալը և «Դպրոցական սնունդ և երեխաների բարեկեցություն» հիմնարկի տնօրեն Սաթենիկ Մկրտչյանը:
Նախարարի տեղակալ Արաքսիա Սվաջյանն անդրադարձել է ֆորմալ կրթության շրջանակում առողջ ապրելակերպի հմտությունների ձևավորմանը: Նրա խոսքով՝ «Առողջ ապրելակերպ» առարկայի խմբակը Հանրակրթության պետական չափորոշչով սահմանվել է որպես պարտադիր խմբակ. «Շատ կարևոր է, որպեսզի մեր երեխաները բավարար պայմաններ ունենան դպրոցներում ֆիզիկական զարգացմանը նպաստող գործունեությամբ զբաղվելու համար: Ներկայում ամենամեծ մարտահրավերներից մեկը երեխաների սակավ շարժունությունն է. դա պայմանավորված է գործունեության ձևերի փոփոխությամբ, բակային խաղերի նվազմամբ և դրանց փոխարեն ՏՏ խաղերին տրամադրվող ավելի մեծ ժամանակով: Այս բոլոր գործոնները հաշվի առնելով՝ անհրաժեշտ է երեխաների շրջանում ճիշտ գաղափարներ ձևավորել ֆիզիկական ակտիվության և առողջ սնվելու վերաբերյալ»:
Նախարարի տեղակալի դիտարկմամբ՝ մարզերի դպրոցներում իրականացվող «Դպրոցական սնունդ» ծրագրի շնորհիվ արդեն իսկ դրական փոփոխություն է նկատվում. «Շրջայցերի ընթացքում մարզային դպրոցների տարրական դասարանների երեխաները, որոնք «Դպրոցական տաք սնունդ» ծրագրից են օգտվում, նախորդ տարիներին սննդի ժամին որոշ աղցաններ և ապուրներ ուտելուց հրաժարվում էին: Այս տարի արդեն պատկերը փոխվել է. ծնողներից էլ ունենք հետադարձ կապ, որ երեխաների սննդակարգն ընդլայնվել է, և նրանք սկսել են ավելի շատ մրգեր, բանջարեղեն, առողջ սնունդ ուտել: Ուրախ եմ, որ ծրագրի ազդեցությունն արդեն իսկ նկատելի է: Առաջիկա ժամանակահատվածում կլուծվի նաև միջին և ավագ դասարանների աշակերտների առողջ սնվելու հարցը՝ դպրոցական բուֆետների աշխատանքի կանոնակարգմամբ»:
Նախարարի տեղակալի տեղեկացմամբ՝ հաշվի առնելով մարզային դպրոցների դրական փորձը՝ նախատեսվում է «Դպրոցական սնունդ» ծրագիրը ներդնել նաև Երևանի դպրոցներում՝ կրտսեր դասարանների աշակերտներին ապահովելով տաք սննդով: Այդ նպատակով նախ կմեկնարկի փորձնական ծրագիր, և մեկ-երկու տարվա ընթացքում աստիճանաբար Երևանի բոլոր դպրոցների տարրական դասարաններն անցում կկատարեն ծրագրին։
ՄԱԿ-ի Պարենի համաշխարհային ծրագրի հայաստանյան գրասենյակի փոխտնօրեն Օսկար Էքդալը ևս նշել է, որ հաջորդ տարի նախատեսվում է ընդլայնել «Դպրոցական սնունդ» ծրագիրը՝ այն փորձարկելով Երևանում։ Արդյունքում՝ ավելի քան 50 000 երեխա կմիանա ծրագրին։ Անդրադառնալով ծրագրի կարևորությանը՝ նա նշել է, որ խոսքը ոչ միայն կալորիաների, այլ նաև մակրո և միկրոէլեմենտների մասին է, որոնք անհրաժեշտ են երեխաների օրգանիզմի ճիշտ զարգացման համար. ««Առողջ ապրելակերպ» ծրագիրը նպաստելու է, որ երեխաները ստանան առողջ սնունդ, ձևավորեն առողջ սովորություններ և վարեն ճիշտ ապրելակերպ։ Այս ամենը հնարավոր չէր լինի՝ առանց ԿԳՄՍ նախարարության հետ սերտ համագործակցության և պետության աջակցության»։
«Դպրոցական սնունդ և երեխաների բարեկեցություն» հիմնարկի տնօրեն Սաթենիկ Մկրտչյանի նշմամբ՝ «Առողջ ապրելակերպ» խմբակի «Սնուցում և ֆիզիկական ակտիվություն» բաղադրիչն ամբողջացել է ԿԳՄՍ նախարարության և ՄԱԿ-ի Պարենի համաշխարհային ծրագրի արդյունավետ համագործակցության արդյունքում։ Աշխատաժողովը հենց այդ բաղադրիչի դասավանդման արդյունավետության բարձրացմանն է միտված։
«Ուսուցիչները ներկայացրել են իրենց լավագույն փորձը, իսկ մասնագետները տեղում արձագանքել են՝ տալով մասնագիտական մեկնաբանություններ»,- ասել է Սաթենիկ Մկրտչյանը և հավելել, որ աշխատաժողովների ընթացքում քննարկված հարցերի հիման վրա կպատրաստվի ուղեցույց, որը կհրապարակվի և կտրամադրվի դպրոցներին՝ իբրև մեթոդական աջակցություն։
Եզրափակիչ հանդիպմանը դասախոսություններով հանդես են եկել կրթական բովանդակության ձևավորման և կիրառման գործընթացում ներգրավված մասնագետները, «Առողջ ապրելակերպ» խմբակի ուսուցիչները ներկայացրել են իրենց հաջողված փորձը, տեղի են ունեցել գործնական և մեթոդական քննարկումներ։
«Դեպի լույս» և «Կանչ» երգչախմբերը՝ խմբավար Վարդուհի Խաչատրյանի ղեկավարությամբ, շարունակում են իրենց ...
Ովքե՞ր են ներկա գտնվել Արսեն Սաֆարյանի դստեր հարսանիքին (տեսանյութ)
Առկա տարաձայնությունների մասին լուրերը բոլորովին անհիմն են և կեղծ
Գլխավոր դատախազի հրամաններով` Դատախազությունում տեղի են ունեցել կադրային փոփոխություններ
Արսեն Սաֆարյանի դստեր՝ Էլենի հարսի պարը Սոֆի Դեւոյանի մասնակցությամբ
Հրշեջ-փրկարարները մարել են Գյումրու Ռասկատլյան փողոցի տներից մեկում բռնկված հրդեհը
Գեղարքունիքում քարով բարձված «ԶԻԼ»–ը բախվել է խոշոր եղջերավոր անասունին․ անասունը տեղում սատկել է, ի...
Այս երկիրը չի ընդունում, որ որևէ մեկի հետնաբակը լինի
1000 խոշոր հարկ վճարողների կողմից վճարված հարկերի և վճարների վերաբերյալ տեղեկատվություն
Քննարկվեց գործարար շրջանակների միջև ուղիղ կապերի հաստատման և հանդիպումների անհրաժեշտությունը