Վրաստանի նախկին վարչապետ Ղարիբաշվիլու համար 370 հազար դոլարի գրավ են պահանջել

Վրաստանի գլխավոր դատախազությունը նախկին վարչապետ Իրակլի Ղարիբաշվիլուց, որը մեղադրվում է անօրինական եկամուտների լեգալացման մեջ, պահանջում է 1 միլիոն լարիի (մոտ 370,4 հազար դոլար) գրավ։ Այս մասին ճեպազրույցի ժամանակ հայտնել է գլխավոր դատախազ Գեորգի Գվարակիձեն։

«Դատախազությունը միջնորդություն է ներկայացրել դատարան՝ մեղադրյալի [Ղարիբաշվիլու] համար որպես խափանման միջոց 1 միլիոն լարիի գրավ սահմանելու վերաբերյալ, որը կարող է ապահովվել ինչպես կանխիկ դրամով, այնպես էլ անշարժ գույքով»,- ասել է Գվարակիձեն։

Վրաստանի գլխավոր դատախազությունն ավելի վաղ հայտնել էր Ղարիբաշվիլու, Պետական ​​անվտանգության ծառայության (ՊԱԾ) նախկին ղեկավար Գրիգոլ Լիլուաշվիլու եւ նախկին գլխավոր դատախազ Օթար Պարցխալաձեի, ինչպես նաեւ նրանց հետ կապված ութ անձանց տների խուզարկությունների մասին: ՊԱԾ-ն ավելի ուշ հայտնել էր, որ նախկին պաշտոնյաների եւ նրանց ընտանիքների անդամների տներից առգրավվել է ավելի քան 7 միլիոն դոլար, 198 թանկարժեք իր եւ ժամացույց, արժեքավոր նկարներ, հազարավոր էջ փաստաթղթեր, 50 բջջային հեռախոս եւ 119 էլեկտրոնային սարք: Գլխավոր դատախազությունն ավելի ուշ հայտնել էր լրացուցիչ ավելի քան 4 միլիոն դոլարի առգրավման մասին։

2024թ․ Ղարիբաշվիլուն փոխարինել է գործող վարչապետ Իրակլի Կոբախիձեն: Ղարիբաշվիլին Կոբախիձեի փոխարեն գլխավորել է իշխող «Վրացական երազանք - ժողովրդավարական Վրաստան» կուսակցությունը, իսկ ապրիլին հայտարարել է քաղաքականությունից հեռանալու մասին: Ղարիբաշվիլին Վրաստանի վարչապետի պաշտոնը զբաղեցրել է 2013-2015թթ․եւ 2021-2024թթ․: Բացի այդ, նա տարբեր ժամանակներում զբաղեցրել է նաեւ ներքին գործերի նախարարության ղեկավարի եւ պաշտպանության նախարարի պաշտոնները: