«Մարտուն Գրիգորյանի թիմում անհաշտություն կա, կարծում եմ` Մինասյանի թեկնածությունը պիտի առաջադրել»

Այդ մտահոգությունները ոչ միայն տեղին չեն, այլ նաև ծիծաղելի են, որովհետև ՔՊ-ն 2018 թվականից ի վեր նմանատիպ արատավոր երևույթների վերջը հենց մեր քաղաքական ուժն է տվել և մեղադրել մեզ մի բանում, որի վերջը մենք ենք դրել, մեղմ ասած ծիծաղելի է։ Այս մասին NEWS.am-ի հետ զրույցում նշեց ՔՊ խմբակցության պատգամավոր Էմմա Պալյանը՝ անդրադառնալով նրան, որ քաղաքական որոշակի շրջանակները իր հետ կապված մտահոգություն են հայտնում, որ ինքը հնարավոր է Գյումրիում պառակտի ընդդիմադիր դաշտը, թույլ չտա, որ ընդդիմադիր թեկնածուն ընտրվի քաղաքապետ, որ հնարավոր է՝ ՔՊ-ն, այսպես կոչված, մարդագողությամբ զբաղվի։

«Քաղաքացու կատարած ընտրությունը մեզ համար օրենք է, ինչպես վարչապետը նշեց հենց ընտրությունների երկրորդ օրը և անքննարկելի է: Բայց միևնույն ժամանակ ես ուզում եմ նշել, որ ՔՊ կուսակցությունը Գյումրիում չի պարտվել, աննախադեպ թվով ձայներ է ստացել:

Այո, 50+ տոկոս ձայներ մեզ չհաջողվեց հավաքել ընտրությունների արդյունքում, բայց մենք այսօր Գյումրու համայնքապետարանում ունենք ամենամեծ խմբակցությունը՝ 14 մանդատ, որը ծառայեցնելու ենք Գյումրու և գյումրեցու բարեկեցության համար: Իսկ մարդագողությունը մեր ձեռագիրը չի եղել, չի էլ կարող լինել երբեւէ»,-ասաց նա:

Հարցին՝ Գյումրիի ավագանու նիստում առաջարկվելո՞ւ է Սարիկ Մինասյանի թեկնածությունը, Պալյանը պատասխանեց. «Այս մասին դեռևս պաշտոնական որոշում չկա, որոշում կունենանք մեր թիմի կողմից, կլինի բնականաբար հայտարարություն և բոլորս կիմանանք:

Իմ սեփական կարծիքով, ճիշտ կլինի Սարիկ Մինասյանի թեկնածությունը առաջադրվի, որովհետև ամենաշատ վստահության քվեն ստացած մարդն է:

Ինչ վերաբերում է նրան, որ ՔՊ-ն չունի բավարար թվով մանդատ, որ իր թեկնածուն ընտրվի քաղաքապետ, ՔՊ-ական պատգամավորն ասաց. «Դե սա քաղաքականություն է, քաղաքական պրոցեսներ են»:

Էմմա Պալյանը նորմալ է համարում, որ ՔՊ-ում ընտրություններից հետո քննարկումներ են  տեղի ունենում. «Ես կարծում եմ, որ մենք բավականին լավ կազմակերպված ընտրություններ ենք ունեցել, բավականին շատ ձայներ ենք ստացել, պիտի դրան համարժեք լինի գնահատականը:

Հարցին՝ ՔՊ-ն ակնկալիք ունի՞ ավագանու նիստում քվեներ ստանալ նաեւ ընդդիմությունից, արդյոք նման սցենար քննարկվում է, Էմմա Պալյանը պատսխանեց. «Որևէ սցենար ընդդիմության հետ կապված մենք այս պահին չենք դիտարկում: Ես նաեւ համաձայն չեմ ձեւակերպմանը, թե վերջապես Գյումրիում ընդդիմությունը միասնական է դարձել: Այդտեղ միասնություն չկա: Ընտրություններից չորս օր անց, կոնկրետ Մարտուն Գրիգորյանի ղեկավարած դաշինքը հայտարարություն է տարածում, որ անհրաժեշտ քվեներ կապահովի, որ Վարդան Ղուկասյանը դառնա քաղաքապետ, բայց նույն իր թիմակիցը դրանից երկու օր անց Հանրայինի եթերում բացարձակ այլ բան է ասում՝ ՔՊ-ին խնդրելով, որ քվեարկի Մարտուն Գրիգորյանի օգտին:

Այսինքն այստեղ պարզ երևում է, որ իրենց մեջ կա այդ հակասությունը: Ճիշտ է, նույն Գրիգորյանը մեկնաբանեց, որ դա անձնական տեսակետ է եղել, բայց ես ապրում եմ Գյումրիում, որոշակի տեղեկատվություններ ունեմ, որ հենց իրենց թիմի ներսում էլ որոշակի անհաշտություններ կան այդ որոշման հետ կապված: Կապրենք կտեսնենք: Սա քաղաքականություն է, քաղաքական պրոցես է և ես առաջ ընկնել և որևէ ենթադրություններ անել չեմ կարող:

Մենք կտեսնենք նախ ինչ կլինի ապրիլի 16-ին, որովհետև այնպիսի մի իրավիճակ է, որ որոշակիություն կունենանք հենց ապրիլի 16-ին։ Դրանից վաղ խոսել ենթադրություններով կամ թվացյալ ինչ-որ բաներ ասել, կարծում եմ ճիշտ չէ»,- հայտարարեց Պալյանը: