Ինչով են վնասակար սննդային հավելումները

Գիտնականները պարզել են, որ պատրաստի սննդից պատրաստված էմուլգատորային սննդային հավելումները վնասում են մարդու աղիները, առաջացնելով բորբոքում։ Միաժամանակ, դրանք նաեւ մեծացնում են օնկոլոգիական հիվանդությունների ռիսկերը։ Այս մասին գրում է Daily Mail հանդեսը։ Էմուլգատորները հավելումներ են, որոնք ավելացնում են սննդին, որպեսզի կանխեն ճարպերի եւ ջրի քայքայումը։ Այն բարելավում է սննդի տեքստուրան եւ արտաքին տեսքը, ինչպես օրինակ՝ յոգուրտների, եւ ավելացնում է սննդի պիտանելիության ժամկետը։ Սակայն այս դրական կողմերով հանդերձ, մասնագետները զգուշացնում են, որ դրանց չափազանց շատ օգտագործումը կարող է քայքայել աղիքները պատող պաշտպանիչ լորձաթաղանթը։

Արդյունքում՝ այնտեղ սկսում են բազմանալ բակտերիաներ, որոնք առաջացնում են բորբոքումներ։ Դա էլ իր հերթին մեծացնում է օնկոլոգիական հիվանդություն ձեռք բերելու հավանականությունը։ Գիտնականները նկատում են, որ եզրակացությունները, որոնց հանգել են հետազոտությունների արդյունքում, վերջնական չեն, սակայն նաեւ հորդորում են պահպանել չափավորությունը՝ էմուլգատորային հավելումների կիրառման հարցում։